Þessa dagana vinna verktakar hörðum höndum við að grafa gríðarmikla holu í Stekkjarvík norðan Blönduóss. Hér er um að ræða framtíðar sorpurðunarstað Austur-Húnavatnssýslu, Skagafjarðar og Akureyrar.

Á síðasta fundi skipulags-, byggingar- og veitunefndar Blönduósbæjar var farið yfir tillögur að svörum við athugsemdum sem bárust vegna aðalskipulags Blönduósbæjar 210-2030. Alls bárust 180 athugasemdir og áttu þær allar við Húnavallaleið. Nefndin féllst ekki á þær athugasemdir að gert verði ráð fyrir Húnavallaleið í aðalskipulaginu.

Á síðasta fundi hreppsnefndar Húnavatnshrepps kom fram að alls bárust 196 athugasemdir við aðalskipulag 2010-2022. Fram kom að 13 stofnunum og 5 sveitarfélögum var send skipulagstillagan til umsagnar. Athugasemdir um að Húnavallaleið sé ekki á aðalskipulaginu voru samtals 190, þar af voru 164 algjörlega samhljóða, en í 26 athugasemdum komu fram mismunandi áherslur varðandi Húnavallaleið.

Atvinnuþróun Samtaka sveitarfélaga á Norðurlandi vestra (SSNV), í samstarfi við Vaxtarsamning Norður­lands vestra, ásamt starfsfólki Hveravallafélagsins, framkvæmdi sumarið 2009 spurningakönnun meðal ferðafólks á Hveravöllum um þjónustuna sem þar er veitt og viðhorf til þess hvaða þjónusta ætti að vera til staðar.

Sameiginlegt mót Golfklúbbs Skagastrandar og Golfklúbbsins Óss á Blönduósi var haldið síðasta laugardag og var tilefnið 25 ára afmæli beggja klúbbanna á þessu ári. Alls tóku 36 golfarar þátt. Mótið var fyrst og fremst til skemmtunar og því var spilaformið svokallað „Texas Scramble“ með forgjöf. Var keppendum raðað upp eftir forgjöf, skipt í miðju og svo dregið saman, einn úr hvorum helmingi.

Hin árlega landskeppni Smalahundafélags Íslands var haldin við frábærar aðstæður á Vorboðavelli við Blönduós helgina 28. - 29. ágúst s.l. Vel var mætt og var 21 hundur skráður til leiks en keppt er í 3 flokkum. Það var smalahundadeildin Snati í Húnavatnssýslu sem sá um framkvæmdina sem var til mikillar fyrirmyndar.

Líkt og í fyrra verður fótbolti í Íþróttamiðstöðinni á Blönduósi fyrir konur á öllum aldri sem kallast „Old girls“. Spilað verður á miðvikudagskvöldum kl. 19:00 – 20:00. Allar konur velkomnar í smá hlaup og skemmtilegheit. Nánari upplýsingar gefur Kristjana í sím 452-4118 eða 849-4649.

Vegna auglýsingar um verkefnastyrki verður Menningarfulltrúi Norðurlands vestra með sérstaka viðtalstíma. Tvær úthlutanir voru ákveðnar fyrir árið 2010 og hefur sú fyrri farið fram. Síðari úthlutunin verður nú á næstunni en lokafrestur er til 15. september n.k.

Vilko á Blönduósi hefur nú hafið framleiðslu á nýju kryddi sem hannað er sérstaklega fyrir popp. Poppsaltið ber keim af osta- og smjörbragði og bragðið þykir minna á gamla góða bíópoppið. Poppsaltið er kjörið á popp sem poppað er á gamla mátann og einnig til að bragðbæta örbylgjupopp. Poppsaltið er án MSG.

Það verður ekki annað sagt um leik Hvatar og KS/Leifturs en að annað liðið sótti til sigurs en hitt til að landa einu stigi. Leikmenn Hvatar voru mun meira með boltann og sköpuðu sér mun fleiri opin færi í leiknum en inn vildi boltinn ekki og því sættust liðin á skiptan hlut. Hvöt er því áfram í 5. sætinu og KS/Leiftur í því sjöunda.

18. ársþing SSNV var haldið í Félagsheimilinu á Blönduósi, í boði Blönduósbæjar, dagana 27. -28. ágúst síðastliðinn. Þingið sóttu um 50 sveitarstjórnarmenn af Norðurlandi vestra og gestir. Ávörp fluttu Kristján L . Möller ráðherra samgöngu og sveitarstjórnarráðherra, Jón Bjarnason sjávarútvegs og landbúnaðaráðherra og Karl Björnsson framkvæmdastjóri Sambands Íslenskra sveitarfélaga.

Hvöt – KS/Leiftur laugardaginn 4. sep. Kl. 14:00 á Blönduósvelli. Gengi Hvatarliðsins hefur verið ágætt í sumar í 2. deildinni í knattspyrnu og er farið að sjá fyrir endann á góðu tímabili. Á morgun verður liðið í baráttu við KS/Leiftur á heimavelli.

Þá er Nöldri kominn aftur í gang eftir sumarfrí. Ekki er nú hægt að segja að hann standi undir nafni í þetta sinn, því hann er óvenjulega jákvæður út í allt og alla. Í septembernöldri sínu þakkar Nöldri fyrir margt af því sem sumarið hefur gefið okkur.

Nú er sumarið að renna sitt skeið á enda og því kominn tími á hitting í Perlunni líkt og undanfarin ár. Þar hittast hressar og kátar konur sem einhverjar taugar hafa átt til Blönduóss og nágrennis í gegnum tíðina.