Ljótu hálfvitarnir ljúka starfsári sínum með tónleikum í Miðgarði í Skagafirði föstudaginn 19. september næstkomandi. Af því tilefni stefnir hljómsveitin á að hækka í botn og skrúfa vel frá öllum fíflalátakrönum. Staðarvalið er vel við hæf og það er alltaf tilhlökkun í hálfvitarútunni þegar keyrt er í Miðgarð, segir í tilkynningu frá hálfvitunum. „Þar er gott að spila og oft myndast ólýsanleg stemming, eða allavega stemming sem óráðlegt er að lýsa í smáatriðum í opinberum fjölmiðli. Fólk verður bara að vera þarna sjálft.“

Forsjálir Skagfirðingar og aðrir nágrannar þeirra geta nálgast miða fram að tónleikunum hjá N1 á Sauðárkróki og í KS í Varmahlíð. Og svo bara við innganginn. Herlegheitin hefjast klukkan níu.