Árbók Ferðafélags Íslands 2015, sem kom út í vikunni, fjallar um Vestur-Húnavatnssýslu. Bókin er um 300 blaðsíður og vönduð að allri gerð með fallegum myndum og greinargóðum kortum. Bókina skrifaði Þór Magnússon, fyrrverandi þjóðminjavörður en hann fæddist á Hvammstanga árið 1937 og ólst þar upp. Í Morgunblaðinu í dag er viðtal við Þór í tilefni af útgáfu bókarinnar.

„Heimasveit mín hefur auðvitað allt annað yfirbragð nú en sú byggð og það samfélag sem ég yfirgaf fyrir meira en hálfri öld. En svipurinn er þó á margan hátt líkur því sem var og í þessu verkefni hefur mér þótt gaman að kynnast betur sögu héraðsins og samtímanum. Ég hef reyndar lengi haldið saman ýmsum fróðleik um héraðið sem kom sér vel sem heimildir og efniviður þegar ég settist niður við þessar skriftir,“ segir Þór í viðtalinu í Morgunblaðinu í dag.

Fram kemur í blaðinu að bókin fjalli um svæðið frá Hrútafjarðará að Gljúfurá. Innan þessara sýslumerkja fari sögumaður réttsælis um sýsluna en þó út fyrir venjubundna boðleið og bæjarröð. Í hverjum kafla séu tekin fyrir afmörkuð landsvæði en ekki hreppar, enda sé búið að leggja hreppana niður. Lýst sé landslagi, sögu og kennileitum, rétt eins og hafi tíðkast í Árbókum FÍ.