Nöldrið | 07. apríl 2014 - kl. 22:05
Fimmtudaginn 27. mars vaknaði ég við hávært gæsagarg þegar fyrstu
sumargestirnir flugu yfir húsið mitt og það var dásamlegur söngur sem sagði mér
að senn kæmi vorið á vængum yfir sæinn. Já, veðrið var fallegt síðustu daga marsmánaðar og farið að sjást í
vetrargosa og krókusa í görðum sem gefur fyrirheit um litríkt sumar. Í pottunum
við sundlaugina lét fólk eins og sumarið væri komið og baðaði sig í sólinni, þó
hitamælir sýndi aðeins tveggja stiga
hita í forsælu.
Ég brá mér á leiksýningu hjá Leikfélagi Blönduóss og
var það kærkomin leikhúsferð, því mér skilst að fjögur ár séu síðan LB setti
leikrit á svið, svo það var kominn tími til. Það er skemmst frá því að segja að
þetta var hin besta skemmtun og snjallt hjá leikhópnum og leikstjóra að finna
þetta leikrit sem er eins og sniðið fyrir hópinn og þá meina ég allt unga
fólkið sem hér stígur sín fyrstu skref á leiklistarbrautinni og stóð sig með
stakri prýði.
Þetta er fjölmenn sýning og þarna mátti sjá efnilega
nýliða í bland við gamla leikfélaga og þó ég sé enginn sérfræðingur í leikgagnrýni
verð ég að hrósa sérstaklega nýliðanum Atla Einarssyni sem skilar
aðalhlutverkinu og það engri smá rullu, með miklum glæsibrag og gamla jaxlinum
Ívari Snorra sem mér fannst dásamlegur í skapvonda gamlingjanum. Ég þakka
aðstandendum sýningarinnar fyrir skemmtilega kvöldstund.
Ég hef ekkert sett mig inni í þær erjur sem verið hafa
vegna auglýsingaskilta við þjóðveginn og vona að athugasemdir mínar í janúarnöldinu
hafi ekki hrundið þeim af stað. Það leiðir aftur á móti hugann að því hvort
ekki séu allt of mörg skilti við veginn gegnum bæinn og sum komin til ára sinna
og orðin lítið augnayndi. Mér finnst t.d. óþarfi að segja vegfarendum þrisvar
sinnum að þeir séu að koma að Blönduósi og mætti fjarlægja blátt og ljótt
Blönduós skilti sem er orðið litlaust og veðrað. Falleg skilti með gagnlegum upplýsingum fyrir
ferðafólk er allt í lagi að hafa en þau, eins og annað þurfa viðhald og of
mikið skiltafargan virka hálf „sjoppulegt“ og spurning hvort ekki er betra að
sameina auglýsingarnar á einu stóru skilti, frekar en að drita þessu út um alla
móa.
Eins og öruggt er að farfuglarnir koma á vorin, þá koma
líka holurnar sitt hvoru megin við Blöndubrúna, djúpar með hvössum brúnum og
geta verið varasamar bílum og sérstaklega varasamar mótorhjólum. Við bæjarbúar
þekkjum þessar holur og vörum okkur á þeim en þetta býður Vegagerðin okkur upp
á ár eftir ár ásamt því að hundsa lagfæringar á brúnni þrátt fyrir beiðni
bæjaryfirvalda um það. Hvað er hægt að gera til að vekja þessi nátttröll sem
stjórna framkvæmdum í þessu landi og gera endalaust upp á milli barnanna sinna. Það
kom frétt um það í vetur að nú ætti Norðvesturlandið að fá innspýtingu í
atvinnumálum. Ekki hef ég séð nein merki þess að unnið sé í þeim málum. Aftur á
móti er nú leitað að hentugum landsvæði fyrir gagnaver á suðvesturhorninu. Hvar
annars staðar!
Nú líður senn að páskum og Blönduósingar, eins og
landsmenn allir hugsa sér gott til glóðarinnar að njóta þeirra frídaga sem þeir
bjóða uppá. Gleðjumst á páskahátíðinni og fögnum sumri að henni lokinni. Og
svona eitt í lokin. Mér finnst löngu tímabært að fjarlægja jólaskraut úr
gluggum og jólasveina úr görðum þeir eru hálfgerð tímaskekkja þegar komið er
fram á vor.
Sumarkveðja frá Nöldra.