Frá fundi innanríkisráðherra með fulltrúum SSNV. Mynd: Innanríkisráðuneytið
Fréttir | 12. apríl 2014 - kl. 10:29
Hanna Birna Kristjánsdóttir innanríkisráðherra kynnti í fyrradag fyrirhugaðar
breytingar á umdæmum embætta sýslumanna og lögreglustjóra á fundi með fulltrúum
embættanna á Blönduósi og Sauðárkróki
ásamt sveitarstjórnarfulltrúum Samtaka sveitarfélaga á Norðurlandi vestra.
Alþingi hefur nú til meðferðar lagafrumvörp er fjalla um þessar breytingar og
bíða þau nú annarrar umræðu. Sagt er frá þessu á vef
innanríkisráðuneytisins.
Bjarni Jónsson, formaður SSNV, setti fundinn og bauð
ráðherra og fylgdarlið velkomið. Innanríkisráðherra fór síðan yfir helstu þætti
lagafrumvarpanna. Þau gera annars vegar ráð fyrir fækkun og stækkun á umdæmum
sýslumanna og hins vegar umdæmum lögreglustjóra. Innanríkisráðherra sagði á
fundinum að tilgangurinn með stærri rekstrareiningum sýslumannsembætta væri að
auka og efla þjónustu ríkisins í héraði og skapa aukin tækifæri til að færa ný
verkefni til sýslumanna. Á sama hátt væri tilgangurinn með breytingum á umdæmum
lögreglustjóra að auka samhæfingu og samstarf innan lögreglunnar um land allt,
standa vörð um grunnþjónustu lögreglunnar, efla stjórnun innan lögreglu og gera
lögreglustjórum kleift að sinna alfarið lögreglustjórn. Frumvörpin gera ráð
fyrir að breytingarnar taki gildi 1. janúar 2015.