Fréttir | 23. júlí 2014 - kl. 09:54
Skipunarbréf til þeirra níu sem fá sýslumannsembætti, samkvæmt nýjum lögum um
sýslumannsembætti, sem taka gildi þann 1. janúar næstkomandi, verða send til
viðkomandi úr innanríkisráðuneytinu í vikunni, samkvæmt heimildum
Morgunblaðsins. Eins og fram hefur komið í fréttum verður sýslumannsembættum á
landinu fækkað úr 24 í 9 og sömuleiðis verður lögregluumdæmum og þar með
embættum lögreglustjóra fækkað úr 15 í 9.
Fram kemur í Morgunblaðinu í dag að Bjarni Stefánsson,
sýslumaður á Blönduósi, verði sýslumaður á Norðurlandi vestra. Aðalstöðvar
sýslumanns á Norðurlandi vestra verða á Blönduósi, en aðalstöðvar lögreglunnar
verða á Sauðárkróki.
Ef heimildir Morgunblaðsins eru réttar er niðurstaðan í
samræmi við umræðuskjöl sem innanríkisráðuneytið birti í byrjun síðasta mánaðar
og ætluð voru til kynningar og samráðs varðandi reglugerð um umdæmismörk og
starfsstöðvar lögregluembætta annars vegar og sýslumannsembætta hinsvegar.
Í umræðuskjölunum kemur
m.a. fram að gert er ráð fyrir að aðalskrifstofa í umdæmi sýslumannsins á
Norðurlandi vestra verði á Blönduósi. Gert er ráð fyrir að sýsluskrifstofa verði
á Sauðárkróki. Aðalskrifstofa sýslumanns er aðsetur hans og verður þar veitt
öll sú þjónusta sem sýslumönnum ber að veita samkvæmt lögum, reglugerðum og
öðrum stjórnvaldsfyrirmælum. Á sýsluskrifstofum verður veitt sama þjónusta og á
aðalskrifstofu sýslumanns.