Ríkisútvarpið ætlar að efla starfsemi sína á landsbyggðinni á næstu misserum að því er segir í tilkynningu frá stofnuninni. Framundan sé vinna við endurskipulagningu, þróun og uppbyggingu til framtíðar á starfsemi Ríkisútvarpsins utan höfuðborgarsvæðisins.

Í tilkynningunni segir að svæðisstjóri Ríkisútvarpsins á Akureyri muni leiða breytingarnar sem framundan eru á starfsemi Ríkisútvarpsins á landsbyggðinni. Hlutverk svæðisstjóra á Akureyri sé með nokkru breyttu sniði en hlutverk stöðvarstjóra hafi verið áður þar sem svæðisstjóri muni stýra starfsemi Ríkisútvarpsins á Akureyri sem og starfsemi á landsbyggðinni. Því hafi verið ákveðið að auglýsa starfið laust til umsóknar og er umsóknarfrestur til 1. september næstkomandi.

Í starfinu felst meðal annars ábyrgð á fréttaflutningi og dagskrárgerð svæðisstöðva í sjónvarpi, útvarpi og á vefnum. Ýmsar breytingar eru áformaðar, meðal annars verður lögð aukin áhersla á miðlun svæðisbundinna frétta á vef Ríkisútvarpsins.

Í tilkynningunni segir einnig að Ríkisútvarpið sé með fréttamenn og fréttaritara í öllum landshlutum en starfsfólki Ríkisútvarpsins á landsbyggðinni hafi fækkað umtalsvert á síðustu árum. Ný yfirstjórn RÚV hafi boðað að aukin áhersla verði lögð á landsbyggðina í starfsemi Ríkisútvarpsins. Endurskipulagning starfseminnar á Akureyri sé fyrsta skrefið í þá átt.