Fréttir | 22. ágúst 2014 - kl. 18:22
Minningartónleikar
um Gretti Björnsson og systkini frá Bjargi verða haldnir í félagsheimilinu
Hvammstanga klukkan 15 sunnudaginn 24. ágúst. Aðgangur er ókeypis og mun
Kvenfélagið Björg selja veitingar á tónleikunum.
Grettir
Björnsson harmonikkuleikari fæddist á Bjargi í Miðfirði 2. maí 1931. Hann lést
þann 20. október 2005. Foreldrar hans voru Margrét Jónína Karlsdóttir, f. 1893,
d. 1991, og Björn Jónsson, bóndi á Torfastöðum í Miðfirði, f. 1905, d. 1982.
Fósturfaðir Grettis var Arinbjörn Árnason, f. 1904, d. 1999.
Grettir
kvæntist 1. janúar 1952, Ernu S. Geirsdóttur, f. 1934 í Reykjavík. Foreldrar
hennar voru Geir Jón Helgason lögregluþjónn, f. 1908, d. 1984, og Regína Sigríður
Guðmundsdóttir, f. 1909, d. 1987. Börn þeirra eru Geir Jón, Margrét, Regína og
Grettir.
Grettir
ólst upp hjá móður sinni á Bjargi fyrstu tvö ár ævi sinnar, en á Bjargi var þó
hans annað heimili fram á unglingsár. Árið 1933 giftist Margrét móðir hans
Arinbirni Árnasyni, frá Neðri-Fitjum. Fluttu þau fljótlega til Hafnarfjarðar og
síðar til Reykjavíkur. Grettir lauk þar gagnfræðaskólanámi, en að auki stundaði
hann klarinettunám í Tónlistarskólanum í Reykjavík og harmónikunám í
einkatímum. Hann fluttist með konu sinni og tengdafólki til Vancouver í Kanada
árið 1952.
Eftir
níu ára búsetu þar vestra fluttist hann heim til Íslands ásamt konu sinni og
börnum. Grettir vann alla sína starfsævi sem harmónikuleikari, við
hljómsveitarstörf og harmónikukennslu. Einnig spilaði hann inn á allmargar
hljómplötur og samdi harmónikulög og vann til margra verðlauna hér heima og
vestan hafs. Hann var í mörgum kunnustu hljómsveitum landsins. Grettir var
meðal annars kjörinn heiðursfélagi Félags harmónikuunnenda í Reykjavík. Grettir
var húsamálari að mennt og vann við þá iðngrein alla tíð ásamt spilamennskunni.
Samferðafólk
Grettis minnist hans sem góðs félaga, sem var bæði skapmikill og ljúfur. Hann
var mikill tónlistarmaður og ólst upp við tónlistarlíf á Bjargi, þar sem söngur
og önnur tónlist var í hávegum höfð. Foreldrar hans voru bæði mikið
tónlistarfólk. Heimild:
Tónleikar.net