Á þessu ári er áformað að tengja 35 íbúðar- og atvinnuhús í sveitum Húnaþings vestra við hitaveitu og er áætlaður kostnaður Hitaveitu Húnaþings vestra 240-250 milljónir króna, að því er fram kemur í Morgunblaðinu í dag. Sveitarstjórn Húnaþings vestra hefur kynnt íbúum Miðfjarðar og Hrútafjarðar áform um heitaveituvæðinguna. Áætlað er að halda áfram næstu tvö árin og ráðgert er að leggja ljósleiðara og jafnvel raflögn með hitaveiturörunum. Fjallað er um hitaveituvæðinguna og áætlaðar framkvæmdir í Morgunblaðinu í dag.

Í fyrsta áfanga yrði lögn um Miðfjörð og byggðina norðan Reykja í Hrútafirði. Ráðgjafi um framkvæmdina er Bragi Þór Haraldsson frá Stoð ehf. á Sauðárkróki. Lögn um Miðfjörð mun koma frá borholum ofan Laugarbakka, vatnshiti er þar nær 90 stig. Jafnhliða vatnslögninni er ráðgert að leggja ljósleiðara, sem myndi bæta netsamband bæjanna afar mikið. Einnig er unnið að því að fá Landsnet og Rarik til að leggja jarðstreng með lögninni, en um sveitina liggur einfasa loftlína, sem er komin til ára sinna.

Í Morgunblaðinu kemur fram að áætlaður kostnaður við tengingu íbúðarhúsa sé 2,2 til 2,5 milljónir króna og hafi þá húsráðendur nokkuð frjálsar hendur um nýtingu vatnsins, lagnir í útihús, heita potta, gróðurhús o.þ.h. Sumir húseigendur þurfi að auki að leggja í verulegan kostnað, þar sem hús þeirra séu nú kynnt með rafmagns-þilofnum. Talið sé að í meðalhúsi geti kostað um eina til eina og hálfa milljón að skipta yfir í vatnshitakerfi. Í þeim tilfellum þurfi trúlega að láta teikna upp nýtt lagnakerfi. Útreikningar bendi til þess að húseigendur spari sér um 250 - 280 þúsund króna á ári með breytingu úr rafveitu í hitaveitu.

Þá kemur fram í Morgunblaðinu að leitað verði til húseigenda á þessum veitusvæðum, hvort hús þeirra verði tengd, svo og leyfi fyrir að leggja lögnina um lönd þeirra. Sveitarstjórn hyggst halda átakinu áfram á næstu árum, með lögn í Víðidal og norðurhluta Miðfjarðarsveitar að vestan. Innri hluti Hrútafjarðar mun bíða um sinn, þar sem bora þarf eftir auknu vatni við Reykjatanga.