Í gær var uppskeruhátíð nemenda knapamerkja og barnastarfs hjá hestamannafélaginu Neista haldin í reiðhöllinni Arnargerði. Engin sýning var þar sem veðrið var leiðinlegt en foreldrar mættu með kökur og úr varð heljarinnar veisla. Mætingin var frábær, að því er fram kemur á vef Neista.

Á hátíðinni voru viðurkenningar og gjafir afhentar til þeirra barna og unglinga sem voru á námskeiðum, en í vetur voru hefðbundin námskeið fyrir krakka yngri en 12 ára og svo knapamerki 1, 2, 3, 4 og 5.  Nú í vor luku þrjú börn og einn fullorðinn prófi í knapamerki 1, tveir unglingar og tveir fullorðnir í knapamerki 2, tveir unglingar og einn fullorðinn í knapamerki 3, en knapamerki 3 er kennt á tveimur árum og eru fjórir í seinni hópnum. Knapamerki 4 er líka kennt á tveimur árum og þar er einn unglingur. Þrír fullorðnir luku prófi í knapamerki 5 og eru þau fyrstu til að ljúka knapamerki 5 á Blönduósi .

Kennarar í vetur voru þau sömu og í fyrra svo þau þekkja alla staðháttu vel. Þau Heiðrún Ósk Eymundsdóttir og Pétur Örn Sveinsson, reiðkennarar í Saurbæ í Skagafirði komu tvisvar í viku frá því í janúar. Þrátt fyrir leiðindaveður féllu fáir dagar niður. Þeim finnst gaman að koma á Blönduós og dást að því að svona lítið félag eins og Neisti skuli geta boðið uppá knapamerkjanámskeið.

Þeim finnst frábært að svona stigskipt nám eins og knapamerki sé í boði í dag. Það er mjög lærdómsríkt, farið er í öll helstu grunnatriði reiðmennsku sem og eðli hestsins, fóðurfærði, beinabyggingu og sögu hestsins svo eitthvað sé nefnt. Hestakosturinn skiptir þó miklu máli en hann er stundum ekki nógu heppilegur. Hestarnir þurfa ekki að vera neitt sérstaklega flottir en vel tamdir og ganghreinir.

Þau sjá mikinn mun á þeim knöpum sem eru með vel tamda hesta og þá sem eru með lítið tamda. Þetta kemur mjög vel í ljós á 5 stiginu, þeir knapar sem hafa byggt upp sína hesta stig af stigi allt frá byrjun eru að ná mestum árangri. Það er erfitt að kenna tveimur byrjendum í einu, bæði knapanum og hestinum og það stendur stundum í veginum fyrir framförum hjá lítið reyndum knöpum. Hesturinn er nefnilega besti kennarinn. Þau segja líka að þau hefðu verið til í að fara á svona námskeið þegar þau voru 12 ára.

Nánari umfjöllun um uppskeruhátíðina og starf Neista má finna á vef félagsins og þar er einnig að finna myndir frá hátíðinni.