Mikil umferð hefur verið á vegum landsins í dag og var umferð um Blönduós mjög mikil enda margir á leiðinni suður og vestur af Pollamóti Þórs og N1 móti KA á Akureyri. Föstudagsumferðin var mikil í gegnum bæinn og nú eftir hádegið var hún enn meiri. Bílaplanið við N1 á Blönduósi var pakkað, svo mikið að sumir töldu sig mega leggja fyrir utan slökkvistöðina sem er ofan við sjoppuna en að sjálfsögðu er það ekki leyfilegt og verður að teljast heppilegt að ekki var útkall hjá Brunavörnum A-Hún á sama tíma því þá hefði verið erfitt að koma bílum slökkviliðsins úr húsi.

Vonandi hafa allir ökumenn komist heilir heim og ekki látið örtröð á vegum landsins trufla dómgreind sína á við aksturinn.