Hrútey er náttúruperla í miðri Blöndu rétt fyrir ofan Blöndubrú og er þekkt fyrir mikið fuglalíf og náttúrufegurð en að auki verpir gæsin þar á vorin og er eyjan lokuð á meðan á varpinu stendur. Fjöldi ferðamanna heimsækir eyjuna á hverju ári en sjaldgæft er að hestar geri sér ferð út í eyjuna en einn slíkur gerði það í gær. Róbert Daníel Jónsson, áhugaljósmyndari, náði nokkrum góðum myndum af folanum í eyjunni en hann hafði það gott um stund eða þangað til hann var sóttur af eiganda sínum.

Hestur í Hrútey var ekki það eina sérstæða sem Róbert tók myndir af í gær heldur voru tveir ferðamenn að renna fyrir laxi á brúnni sem veitir aðgang að eyjunni og höfðu greinilega ekki gert sér grein fyrir því að það þyrfti að hafa leyfi til þess að veiða sér í soðið.

Fleiri myndir af hestinum og „veiðiþjófunum“ má finna á Fésbókarsíðu Róberts https://www.facebook.com/robbidan75?fref=ts.