Íþróttadagur Blönduskóla var haldinn síðastliðinn fimmtudag og var fjör og gleði hjá nemendum allan daginn. Að venju var byrjað á Norræna skólahlaupinu þar sem nemendur og starfsfólk skólans ýmist gekk eða skokkaði 2,5 kílómetra eða 5 kílómetra. Þrátt fyrir svolítinn sudda gekk hlaupið vel og allir skiluðu sér heim í íþróttasalinn þar sem beið þeirra fullur salur af stöðvum sem hægt var að velja úr. Þá beið spil og önnur afþreying í heimastofum þriðja og fjórða bekkjar.

Sagt er frá deginum á vef Blönduskóla og á myndasíðu skólans má sjá fjölmargar myndir frá deginum.

Eftir að æsispennandi bocciakeppni lauk var allt tekið saman og stillt upp þrautabrautum þar sem fyrsti og annar bekkur öttu kappi og svo þriðji og fjórði bekkur. Þegar þessir nemendur höfðu lokið sínum þrautum tók við bekkjarkeppni í fimmta til sjöunda bekk og svo áttunda til tíunda bekk í skotboltaleiknum "Dodgeball". Tíundi bekkur keppti svo við starfsfólk skólans í fótbolta og náði að sigra 2 - 1 eftir æsispennandi leik þar sem tímavörðurinn tók óvænt völdin.

Í lok dagsins var svo boðið upp á limbókeppni og skotbolta.