Byggðarráð Húnaþings vestra hefur falið rekstrarstjóra að kanna hvort dekkjakurl á sparkvöllum í sveitarfélaginu sé heilsuspillandi. Stjórn Heimilis og skóla – landssamtaka foreldra hefur farið fram á það við sveitarfélög landsins að gervigrasvellir sem þaktir eru gúmmíkurli úr dekkjum verði endurnýjað í ljósi upplýsinga um að dekkjakurl á fótboltavöllum innihaldi krabbameinsvaldandi efni.

Bréf samtakanna var lagt fram á fundi byggðarráðs Húnaþings vestra í gær. Í fundargerð ráðsins kemur fram, hvað varðar sparkvellina á Hvammstanga og Borðeyri, að um sé að ræða svart gúmmí, vottað af framleiðanda fyrir leiksvæði barna. Það sé slitsterkt og brotni því lítið niður og gefi þar að leiðandi ekki frá sér jafn mikið eiturefni og annað gúmmí. Þá segir í fundargerðinni að fyrirtækið Sport-tækni hafi komið í sumar, hreinsað vellina, allt ryk, gróður og óhreinindi, þvegið kurlið og sett það aftur ofaní vellina ásamt viðbót.

Í bréfi Heimilis og skóla segir kurlið sé unnið úr ónýtum bíldekkjum og dreift á gervigrasvelli til að gera þá mýkri. Óþarfi sé að taka áhættu með efni sem mögulega gætu skaðað fólk. Þess vegna sé farið fram á það við stjórnendur sveitarfélaga landsins að unnið verði að því án tafar að endurnýja þá velli sem þaktir eru heilsuspillandi dekkjakurli svo börnin geti leikið sér og þjálfað færni örugg og við heilsusamlegar aðstæður.

Eins og áður sagði ákvað byggðarráð Húnaþings vestra að fela rekstrarstjóra að kanna hvort dekkjakurlið á sparkvöllum sveitarfélagsins væri heilsuspillandi.