Húnavatnshreppur ætlar að eyða skógarkerfli í sveitarfélaginu með skipulögðum hætti á vordögum næsta árs. Í fréttabréfi Húnavatnshrepps biðlar sveitarstjóri til íbúa að senda sér upplýsingar um umfang skógarkerfils í þeirra landi fyrir 26. október næstkomandi. Skógarkerfill hefur verið að dreifa sér í Húnavatnshreppi undanfarin ár og kortleggja á hvar hann sé byrjaður að sá sér. Vinna á að því að hefta útbreiðslu hans með slætti að lágmarki þrisvar á sumri hverju.

Málið var fyrst til umræðu á fundi sveitarstjórnar í fyrr en í fundargerð sveitarstjórnar frá 8. ágúst 2014 segir að skógarkerfill sé vágestur sem dreifir sér hratt þar sem hann hafi náð að sá sér. Sé það helst á svæðum sem búpeningi sé ekki beitt og sé því líklegast að hann dreifi sér í vegköntum og skurðum og skurðbökkum sem séu afgirtir.

Einnig segir í fundargerðinni að Í Húnavatnshreppi hafi hann verið fram undir þetta á mjög afmörkuðum svæðum eins og til dæmis í kringum og út frá Laxárvatnsvirkjun. Þar sem hann hafi náð að breiða úr sér verði gróðurþekjan mjög einsleit og kaffæri hann annan gróður á þeim svæðum.

Þá segir að helst sé hægt að koma í veg fyrir að hann dreifi sér í miklu mæli ef ráðist sé gegn honum sem fyrst þar sem hann hafi stungið sér niður. Árangursríkasta aðferðin virðist vera að slá hann sem fyrst á vorin og sem oftast yfir sumarið þannig að hann nái ekki að fella fræ.