Húnaþing vestra tekur þátt í Hreyfiviku annað árið í röð en hún hefst í dag og stendur til 29. maí næstkomandi. Tilgangur Hreyfivikunnar er að hvetja til virkrar hreyfingar og þátttöku í íþróttum þannig að fólk hreyfi sig að minnsta kosti 30 mínútur á dag. Skipuleggjendur Hreyfiviku í Húnaþingi vestra eru íþrótta- og tómstundafulltrúi Húnaþings vestra í samstarfi við USVH, skóla, stofnanir og ýmsa fleiri aðila sem koma að hreyfingu á einn eða annan hátt. Í haust er svo stefnt að því að halda forvarnar- og heilsuviku í Húnaþingi vestra.

Einn liður í hreyfivikunni er sundkeppni á milli sveitarfélaga. Árið 2015 tóku 28 sveitarfélög virkan þátt í keppninni og syntu 4.300 einstaklingar samanlagt 4.900 kílómetra sem er álíka langt og frá Íslandi til New York!

Það eina sem þarft að gera til að taka þátt er að skrá sig á eyðublað sem liggur frammi í afgreiðslu sundlaugarinnar og hversu marga metra synt er á hverjum degi. Sundæfingar og skólasund telst ekki með. Það eru samtökin International Sport and Culture Association (ISCA) sem standa fyrir verkefninu en Ungmennafélag Íslands fylgir því eftir hérlendis.