Blönduósbær hefur fengið aðild að Samtökum orkusveitarfélaga. Í síðustu viku var inntökubeiðni sveitarfélagsins samþykkt á aðalfundi samtakanna. Aðildarsveitarfélögin eru þá orðin 21 talsins en þar á meðal er sveitarfélagið Húnavatnshreppur. Á aðalfundinum var ný stjórn samtakanna kosin og á Sigrún Hauksdóttir úr Húnavatnshreppi sæti í henni. Arnar Þór Sævarsson, bæjarstjóri á Blönduósi var kosinn varafulltrúi.

Stefán Bogi Sveinsson, bæjarfulltrúi á Fljótsdalshéraði, var kjörinn formaður samtakanna. Stefán Bogi tekur við formennskunni af Gunnari Þorgeirssyni, oddvita Grímsnes- og Grafningshrepps.

Samtök orkusveitarfélaga voru stofnuð árið 2011 og er markmið þeirra einkum að standa vörð um hagsmuni aðildarsveitarfélaga í öllum málum sem tengjast byggingu orkuvera og virkjana, orkunýtingu, fjárhagslegum hagsmunum í þessu sambandi og umhverfismálum.

Megináhersla hefur verið lögð á að þrýsta á um nauðsynlegar breytingar í skattaumhverfi orkuframleiðslu, með áherslu á fasteignagjöld, en einnig hafa samtökin látið sig varða lagaumhverfi vindorkuframleiðslu ásamt fleiri þáttum.

Ný stjórn var skipuð til tveggja ára:

Stefán Bogi Sveinsson, Fljótsdalshéraði, formaður

Árni Eiríksson, Flóahreppi

Dagbjört Jónsdóttir, Þingeyjarsveit

Gunnar Þorgeirsson, Grímsness- og Grafningshreppi

Kristín María Birgisdóttir, Grindavíkurbæ

Sigrún Hauksdóttir, Húnavatnshreppi

Unnur Lára Bryde, Hafnarfjarðarbæ

Arnar Þór Sævarsson, Blönduósbæ, varafulltrúi

Gunnsteinn Ómarsson, Ölfusi, varafulltrúi

Nanna Jónsdóttir, Ásahreppi, varafulltrúi

Þorsteinn Gunnarsson, Skútustaðahreppi, varafulltrúi