Mikill áhugi er á ókeypis námskeiðum fyrir 50 ára og eldri í þreksal Íþróttamiðstöðvarinnar á Blönduósi sem nú stendur yfir á mánudögum næstu fjórar vikurnar. Uppbókað er námskeiðin og komnir biðlistar. Það er Ungmennasamband Austur-Húnvetninga og Íþróttamiðstöðin á Blönduósi sem standa fyrir námskeiðinu. Sagt er frá þessu á vef Ungmennafélags Íslands.

Á námskeiðunum er þátttakendum, 50 ára og eldri, kennt á tól og tæki í þreksal Íþróttamiðstöðvarinnar. Fyrstu tímarnir voru síðastliðinn mánudag og var kennt í tveimur hollum, á milli klukkan 9-10 og 10-11. Ákveðið hefur verið að þátttakendur námskeiðsins fá frían aðgang að þreksalnum alla daga vikunnar á meðan námskeiðið stendur yfir og ókeypis í sund á eftir.

Í frétt á vef UMFÍ er rætt við Steinunni Huldu Magnúsdóttur, íþróttakennari og þjálfari sem býr á Blönduósi. Hún á frumkvæðið að því að halda námskeiðið og sér hún um kennsluna. Steinunn er íþrótta- og heilsufræðingur frá Háskóla Íslands og hefur hún kennt fjölda námskeiða, m.a. sund fyrir eldri borgara í höfuðborginni auk þess að stýra frjálsum íþróttum á Blönduósi. Hún segir tilurð námskeiðanna þá að hún hafi sest í stjórn USAH í fyrravor og séu þau í samræmi við stefnumótunarvinnu ungmennafélagsins sem meðal annars kveði á um heilsueflingu eldra fólks.

„Þetta blundaði í mér, ég viðraði hugmyndina við stjórn USAH og svo kýldum við bara á þetta,“ segir Steinunn.

Mikill áhugi er á því að komast á námskeiðið í Íþróttamiðstöðinni. Hún stóð fyrir álíka kynningu á æfingum í þreksal á Blönduósi í nokkra daga í fyrra og vakti það áhuga margra að halda áfram.

„Sumir sem tóku þátt þá eru að skila sér til baka enda þeir sem mættu mjög áhugasamir,“ segir Steinunn sem er úr sveitinni en flutti aftur á Blönduós fyrir tveimur árum eftir viðdvöl og nám í Reykjavík.

Hún bendir á að nauðsynlegt sé að hafa námskeið sem þessi fyrir 50 ára og eldri. Fólk í þessum aldurshópi hafi sumt ekki farið í þreksal og þurfi kennslu á tólin og tækin. Það sé gott að gera í lokuðum og litlum hópum.

Eins og áður segir eru námskeiðin í klukkutíma í senn á mánudagsmorgnum. Átta komast á hvert námskeið i hvert sinn eða sextán í heildina. Uppbókað var mjög snemma á bæði námskeiðin og hafa þegar tólf skráð sig á biðlista.

„Námskeiðin í gær gengu rosalega vel og fólkið var gríðarlega ánægt. Þetta er gott tækifæri til að koma sér af stað,“ segir Steinunn. Boðið er upp á nýtt æfingaprógramm á hverjum mánudegi í þær fjórar vikur sem námskeiðið stendur yfir.

„Það er greinilega eftirspurn eftir svona námskeiðum fyrir fólk á þessum aldri enda er þetta  kærkomið tækifæri til að koma sér af stað,“ segir Steinunn á vef UMFÍ.

Steinunn veit ekki hvort fleiri ungmennafélög vinni með sveitarfélögum að heilsueflingu 50 ára og eldri með sama hætti.

Meðfylgjandi myndir eru frá UMFÍ og teknar af Ómari Braga Stefánssyni.