Ã� dag voru samfélagsviðurkenningar veittar á vegum fjölskyldusviðs Húnaþings vestra. Alls bárust ellefu tilnefningar til fjölskyldu- og félagsmálaráðs sem ákvað að veita þremur viðurkenningu að þessu sinni. Handhafi samfélagsviðurkenningar fær, auk viðurkenningarskjals, selshaus úr leir eftir leirlistakonuna Grétu Jósefsdóttur. Þau sem hlutu viðurkenningu að þessi sinni voru:

• Lionsklúbburinn Bjarmi í samstarfi við karlakórinn Lóuþræla, Húsfreyjurnar á Vatnsnesi, kvenfélagið Björk og fleiri vegna kótelettukvölds í mars 2016.
• Pálína Fanney Skúladóttir, kennari og organisti.
• Laura Ann Howser, kennari.

Félagsmálaráð veitir samfélagsviðurkenningu Húnaþings vestra að jafnaði annað hvert ár. Veita má eina til þrjár viðurkenningar hverju sinni og var hún í fyrsta skipti veitt í febrúar 2015. Fjölskyldusvið Húnaþings vestra auglýsti eftir tilnefningum til samfélagsviðurkenninga fyrir árið 2016 í byrjun janúar síðastliðinn, frá íbúum sveitarfélagsins, um þá aðila sem þeir töldu eigi skilið virðingarvott fyrir verk sín eða störf í þágu samfélagsins í Húnaþingi vestra. Allir komu til greina, jafnt einstaklingar, fyrirtæki sem og félagasamtök, sem höfðu með gjörðum sínum og framgöngu látið gott af sér leiða og verið öðrum góð fyrirmynd.