Fréttir | 23. maí 2017 - kl. 12:53
Íslandsmeistaramótið í ísbaði verður haldið í sundlauginni á Blönduósi í dag klukkan 17:15 og verða keppendur sex. Mótinu er ætlað að kynna heilsubót ískaldra baða. Benedikt Lafleur mun kynna heilsugildi ísbaða og meistararitgerð sína Vatnið er kalt og djúpt eins og vitund mín sjálfs. Svo verður keppt í því hver getur verið lengst ofan í ísbaði.
Á síðasta ári fór mótið fram í sundlaug Sauðárkróks og þá sigraði Sara Jóna Emilía en hún sat í ískarinu í 13:13 mínútur. Vatnið var við frostmark og karið fullt af ís.
Stuðningsaðilar keppninnar eru Sundlaugin á Blönduósi (Blönduósbær), Ísgel ehf., veitingastaðurinn B&S, Fiskmarkaðurinn á Skagaströnd og fiskbúðin Fisk á disk á Blönduósi. Sigurvegarinn fær að launum glerstyttu en aðrir keppendur viðurkenningarskjal. Eins fá allir krakkar sem prófa að fara í ísbaðið viðurkenningarskjal.