Sundlaugin á Blönduósi. Ljósm: Róbert Daníel
Vilhjálmur Andri Einarsson sigraði á mótinu. Ljósm. Róbert Daníel
Sjúkraflutningsmaðurinn Einar li var á svæðinu. Ljósm. Róbert Daníel.
Ljósm. Róbert Daníel
Fréttir | 24. maí 2017 - kl. 09:05
Nýtt Íslandsmet í ísbaði
Nýtt Íslandsmet var sett í gær á Íslandsmeistaramótinu í ísbaði sem haldið var í sundlauginni á Blönduósi. Vilhjálmur Andri Einarsson sat í ísköldu ísbaði í 20 mínútur og 18 sekúndur og bar sigur út býtum á mótinu. Benedikt Lafleur varð í öðru sæti með tímann 17 mínútur og 21 sekúnda og í þriðja sæti varð Helgi Gunnar Thorvaldsson, Vestur-Íslendingur sem aldrei fyrr hafði farið í ísbað með tímann 15 mínútur og 4 sekúndur.
„Þetta gekk rosalega vel,“ sagði Benedikt Lafleur, skipuleggjandi mótsins, í samtali við mbl.is í gær. „Ég er mjög ánægður með umgjörðina, fyrirkomulagið og aðstoðarmenn en það voru sjúkraflutningamenn frá Blönduósi sem voru með sjúkrabíl reiðubúinn við sundlaugina. Öll öryggisatriði voru eins og best var á kosið.“
Benedikt var steinhissa á frammistöðu keppenda sem hafi staðið sig vonum framar. Hann sagði helsta markmið keppninnar að sýna fram á heilsugildi kaldra baða. Því sé ekki aðalatriði að setja met, „þó að maður vilji alltaf gera betur en maður hefur áður gert.“
Alls tóku 6 keppendur þátt og setið var í tveimur körum á sama tíma. Eftir keppnina fengu krakkar á svæðinu að prófa að sitja í vatninu.