Fréttir | 19. júlí 2017 - kl. 09:30
Ásdís Brynja Jónsdóttir frá Hofi í Vatnsdal hefur verið valin í hollenska landsliðið í hestaíþróttum. Systir Ásdísar, Lara Margrét Jónsdóttir, var því miður ekki valin í liðið þrátt fyrir mikla vinnu og þjálfun úti í Hollandi. Ásdís segir í samtali við Feyki að leiðarvísirinn fyrir landsliðsvali sé öðruvísi háttað í Hollandi en á Íslandi en þar þurfi að ná ákveðinni lágmarkseinkunn á „world ranking“ mótum til að eiga möguleika á að verða valinn.
„Ég var búin að ríða lágmörkin einu sinni fyrir Íslandsmótið sem fór fram á Hólum svo spennan var í hámarki. Ég reið svo lágmörkin í forkeppninni í fimmgangi og sigraði svo b-úrslitin með 6,31 sem fóru fram á laugardaginn. Seinna sama dag fékk ég svo að heyra að ég væri komin í landsliðið,“ segir Ásdís í Feyki.
Hesturinn sem Ásdís keppir á heitir Sleipnir frá Runnum og er 11 vetra gamall undan Orra frá Þúfu og Grímu frá Lynghaga. „Ég myndi lýsa hestinum sem heilsteyptum alhliða gæðingi með frábært geðslag.“