Úthlutun úr Fullveldissjóði fór fram í gær og hlutu átta aðilar á Norðurlandi vestra styrki, samtals að fjárhæð 5,8 milljónir króna, til verkefna á næsta ári vegna 100 ára fullveldisins. Textílsetur Íslands fékk eina milljón króna í styrk vegna verkefnisins Prjónagleði - 100 ára fullveldi Íslands.

Prjónagleði samanstendur af fjórum þáttum, í fyrsta lagi samstarfi við skóla í Húnavatnssýslum þar sem velt verður upp mikilvægi fullveldis og prjónaskapar fyrir Íslendinga. Prjónasamkeppi verður þar sem markmiðið er að draga fram samlíkingu milli fortíðar og nútíðar í sögu lands og þjóðar með tilvísun í fullveldi Íslands. Samstarf verður við háskólann í Concordia í Kanada en nemendum frá þeim sem dvelja í Textílsetrinu verður boðin þátttaka í verkefninu. Lokapunkturinn verður sýning á verkefnum nemenda og annarra þátttakenda á Prjónagleði 2018.

Digital horse ehf., Árni Gunnarsson, fékk 1,5 milljón króna styrk fyrir verkefnið Menning, tunga og tímagöng til 1918. Verkefnið er farandsýning fyrir börn (og fullorðna) og verður í boði fyrir aldurshópinn frá 8. bekk grunnskóla til fyrstaársnema framhaldsskóla um land allt. Sýningin er sett upp sem göng þar sem áhorfandi gengur inn í rými og á leiðinni gegnum rýmið sér áhorfandinn hvernig það var að vera til árið 1918, m.a. með sýndarveruleikagleraugum.

Skagfirski kammerkórinn fékk 900 þúsund króna styrk fyrir verkefnið Í takt við tímann. Skagfirski kammerkórinn ræðst í stórverkefni í tilefni afmælisársins en það er verkið Magnificat eftir breska tónskáldið John Rutter. Það má segja að það sýni þróunina í verkefnavali almennra kóra á 100 árum og hvað Íslendingar eru að fást við í dag, á 100 ára afmæli fullveldisins. Hinn hluti tónleikanna er helgaður íslenska einsöngslaginu en það hefur lifað með þjóðinni í 100 ár. Í þeim hluta er ætlunin að gera íslenska einsöngslaginu hærra undir höfði með nýjum hljómsveitarútsetningum. Valin verða einsöngslög ólíkra höfunda með áherslu á skagfirska arfinn. Haldnir verða þrennir tónleikar í þrem landshlutum.

Guðmundur Ragnarsson f.h. áhugahóps um sögu Dana á Sauðárkróki í upphafi 20. aldar fékk 800 þúsund króna styrk fyrir verkefnið Danirnir á Króknum – Um þátttöku Dana í bæjarlífi Sauðárkróks í upphafi 20. aldar. Fyrirhugað er að fagna 100 ára fullveldi Íslands með því að setja upp sýningu í tali og tónum þann 1. desember 2018. Sýningunni er ætlað að gera sögu Dana á Sauðárkróki í lok 19. aldar og upphafi þeirrar 20. nokkur skil með jákvæðum og skemmtilegum hætti. Gert er ráð fyrir tveimur sýningum á Sauðárkróki. Sýningin samanstendur af lestri texta um Danina okkar og veru þeirra hér og á milli upplesinna texta og leikinna atriða verður flutt dönsk og íslensk tónlist þar sem leitast er við að fanga tíðarandann í upphafi 20. aldarinnar. Um er að ræða samstarfsverkefni þar sem koma saman nokkur félagasamtök og stofnanir í Skagafirði og standa að viðburðinum.

Háskólinn á Hólum fékk 600 þúsund króna styrk fyrir verkefnið Áhrif skólahalds á Hólum í Hjaltadal. Markmið verkefnisins er að varpa ljósi á hlutverk og áhrif skólahalds á Hólum á þróun íslensks samfélags frá fullveldi til framtíðar. Sérstaklega verður horft til áhrifa Hólamanna á umhverfi sitt með hliðsjón af sjálfstæði, byggðaþróun, menntunarstigi og tækniframförum. Haldin verður tveggja daga ráðstefnu að Hólum í Hjaltadal. Ráðstefnan verður öllum opin og munu fræðimenn og fyrrverandi nemendur skólans halda erindi um hugðarefni sín sem tengjast yfirskriftum málstofa en þær eru sjálfstæði, byggðaþróun, menntun og tækniframfarir.

Sögusetur íslenska hestsins fékk 500 þúsund króna styrk fyrir verkefnið Íslenski hesturinn – þjóðarhesturinn – efling og uppgangur við fullveldi. Sögusetur íslenska hestsins hyggst setja upp sýningu um íslenska hestinn og hestamennsku, stöðu hestamennsku um fullveldið og framfarasókn á fullveldistímanum. Í sýningunni kristallast hvernig frjáls og fullvalda þjóð hefur tryggt vöxt og viðgang síns þjóðarhests og komið honum á framfæri við heimsbyggðina og skapað honum þar, í samstarfi við aðrar þjóðir þar sem áhugi hefur verið til staðar, viðgang og virðingu. Sýningin verður fyrst sett upp á Landsmóti hestamanna 2018 en síða varanlega í Skagafirði.

Akrahreppur fékk 400 þúsund króna styrk fyrir verkefnið Hver á sér fegra föðurland. Verkefnið er hugsað sem vekjandi og gleðileg dagskrá eina kvöldstund. Kórar munu syngja lög frá þeim hundrað árum sem þjóðin hefur verið fullvalda ríki. Milli söngatriða verður flutt lesin og leikin dagskrá um sögu þjóðar í hundrað ár. Lögð verður áhersla á mikilvægi þess að fá að lifa í frjálsu og friðsömu landi. Komið verður rækilega til skila að slíkt er ekki sjálfsagt og undirstrikað hve dýrmætt frelsið er. Verkefnið er unnið í samstarfi við Karlakórinn Heimi, Kvennakórinn Sóldís og Gangnamannafélag Austurdals.

Varmahlíðarskóli fékk 100 þúsund króna styrk fyrir verkefnið Fullveldi – frelsi – lýðræði – hvað er nú það? Helstu markmið með verkefninu eru að: - efla vitund nemenda á hugtökunum fullveldi, frelsi og lýðræði; - nemendur átti sig á hlutverki sínu sem meðlimir í fullvalda samfélagi og þjálfist í lýðræðislegri hugsun og vinnubrögðum; - nemendur fræðist um margvíslegar gerðir stjórnarfars í heiminum; - nemendur fái innsýn í hvernig lífið var á Íslandi fyrir og eftir fullveldi. Áhersla verkefnis er tvíþætt: fullveldið Ísland og umheimurinn, nemandinn og samfélagið. Nemendur vinna ýmis verkefni, haldin verður afmælishátíð fullveldis Íslands þar sem nemendur kynna verkefni og stýra málþingi um viðfangsefnið. Samstarf er við eldri borgara og foreldra.​