101. ársþing Ungmennasambands Austur Húnvetninga fór fram í gær á Húnavöllum. Mættir voru fulltrúar frá öllum aðildarfélögum nema einu auk gesta frá UMFÍ. Rúnar A. Pétursson, formaður USAH, setti þingið og bauð alla velkomna og fór yfir starfsemi sambandsins á síðasta ári en fjölmargt var gert og mörg afrek unnin hjá félögum í USAH. Rekstur sambandsins gekk vel og er það aðallega auknum Lottó tekjum að þakka.

Á þinginu voru afhent Hvatningarverðlaun sambandsins en að þessu sinni var það Sigrún Líndal hjá Fram á Skagaströnd sem þau hlaut fyrir óeigingjarnt starf sitt fyrir sambandið og margar nýjungar sem hún hefur bryddað upp á í starfi sínu á Skagaströnd. Þá var tilkynnt um val á Íþróttamanni ársins hjá USAH og fyrir valinu varð Ásdís Brynja Jónsdóttir hjá Hestamannafélaginu Neista.