Á miðvikudaginn klukkan 11 verður tekin skóflustunga að byggingu gagnavers við Svínvetningabraut á Blönduósi undir starfsemi hýsingarfyrirtækisins Borealis Data Center ehf. Húsið verður 640 fermetrar að stærð og kostar 150 milljónir króna fullbúið. BDC North ehf. ætlar að byggja og reka húsið en félagið verður í eigu Ámundakinnar ehf. og Borealis Data Center. Áætlað er að húsið verði risið innan mánaðar og eru áform um að byggja fleiri hús á lóðinni.​

Í júní 2017 átti sveitarstjórn Blönduósbæjar fundi með fulltrúm Borealis Data Center en fyrirtækið var þá að leita að hentugri staðsetningu fyrir gagnaver þar sem landrými er og gott aðgengi að raforku. Í febrúar síðastliðnum sótti fyrirtækið svo um lóð undir gagnaver á svæði við Svínvetningabrautina. Í umsókninni kom fram að áform væru um að byggja tvö hús á lóðinni á þessu ári, samtals um 1.200 fermetra. Áætlað var að fyrst húsið yrði 640 fermetra stálgrindarhús á steyptum sökkli klætt með samlokueiningum og að næsta hús yrði um 580 fermetrar. Í umsókninni komu fram áform um að byggja fleiri hús á lóðinni á næstu árum.

Blönduósbær og Húnavatnshreppur leggja til fjármagn
Á stjórnarfundi Ámundakinnar í síðustu viku var fallist á erindi sveitarstjórna Blönduósbæjar og Húnavatnshrepps um kaup á hlutabréfum í Ámundakinn fyrir 20 milljónir króna. Kaupin eru háð skilyrði um að Ámundakinn ráðstafi andvirðinu til kaupa á hlutabréfum í einkahlutafélaginu BDC North. Blönduósbær kaupir 7,5 milljónir hluti og Húnavatnshreppur 2,5 milljón hluti sem seldir eru á genginu 2,0. Í framhaldi af hlutabréfakaupunum mun Ámundakinn kaupa hluti í BDC North fyrir 20 milljónir króna í samræmi við óskir sveitarstjórnanna. Áformað er að hlutafé BDC North verði 50 milljónir króna í byrjun og verður hlutur Ámundakinnar því 40% á móti 60% hlut Borealis Data Center. Jafnframt samþykkti stjórn Ámundakinnar að tilnefna Valgarð Hilmarsson í stjórn hins nýja félags.

Fjármögnun ekki að fullu tryggð
Viðræður hafa staðið yfir undanfarin misseri um að Ámundakinn myndi byggja húsin undir gagnaverin og Borealis Data Center leigja þau. Um miðjan apríl tók málið aðra stefnu þegar Blönduósbær lagði til að sveitarfélagið, ásamt Húnavatnshreppi myndu leggja fram sameiginlega 20 milljónir króna í verkefnið með því skilyrði að þeir fjármunir færu í gegnum Ámundakinn og þaðan inn í BDC North. Sú ráðstöfun hefur verið samþykkt í sveitarstjórnunum tveimur og í stjórn Ámundakinnar eins og að ofan greinir. Fjármagna á afganginn af byggingakostnaðinum, eða um 100 milljónir króna, með lánum og mun sá hluti verkefnisins ekki vera frágenginn að fullu ennþá.

Tengdar fréttir:

Milljónir í húsnæði undir gagnaver

Bitcoin námugröftur á Blönduósi

Sótt um lóð fyrir gagnaver á Blönduósi

Skoða aðstæður fyrir gagnaver