Velferðarsjóður Húnaþings vestra fékk veglega gjöf frá Ólöfu Ólafsdóttur á Tannstaðabakka. Ólöf mætti á fund stjórnar sjóðsins á miðvikudaginn og færði honum 504.000 krónur. Ólöf hefur unnið að gerð bútasaumsteppa undanfarið ár og selt gestum og gangandi m.a. á jólamarkaðnum í Félagsheimili Hvammstanga fyrir skömmu. Raunar gerði Ólöf slíkt hið sama í fyrra og lét þá umtalsverða upphæð af hendi rakna til Velferðarsjóðsins.

Sagt er frá þessu á vef Húnaþings vestra. Þar kemur fram að stjórn velferðarsjóðsins sé bæði hrærð og glöð yfir þessu göfuga framtaki Ólafar og þakklát fyrir þann fallega hug sem búi að baki.

Hægt er að sækja um í velferðarsjóðinn núna fyrir jól. Þeir sem eiga rétt á því eru aðilar sem eru að glíma við fjárhagsvanda.

Eftirfarandi aðilar svara fyrir hönd sjóðsins:
Elísa Sverrisdóttir, fyrir hönd Rauðakross: elisasverris@gmail.com
Jenný Þórkatla Magnúsdóttir, fyrir hönd Fjölskyldusviðs: jenny@hunathing.is
Magnús Magnússon, fyrir hönd kirkjunnar: srmagnus@simnet.is