Á sveitarstjórnarfundi Húnaþings vestra í síðustu viku var lagt fram erindi frá velferðarráðuneytinu um móttöku flóttamanna. Í því er farið á leit við sveitarfélagið um að taka á móti sýrlensku flóttafólki á næsta ári, um 25 einstaklingum. Í því felst meðal annars aðstoð við að finna húsnæði til leigu og veita því nauðsynlega þjónustu og aðstoð í eitt ár frá komu þess til landsins. Gerður yrði samningur milli Húnaþings vestra og velferðarráðuneytisins þar að lútandi um fjárframlög til verkefnisins.

Í bókun sveitarstjórnar er erindinu fagnað og þeirri samfélagslegu ábyrgð sem því fylgir. Í bókuninni segir einnig: „Samfélagið í Húnaþingi vestra er umburðarlynt, skilningsríkt og styðjandi. Til staðar er fagþekking og stofnanir sveitarfélagsins eru öflugar. Því er sveitarstjórn sannfærð um að vel verði staðið að móttöku, utanumhaldi og stuðningi við flóttafólk.“

Sveitarstjóra var falið að undirrita fyrirliggjandi samning við velferðarráðuneytið.