Á sveitarstjórnarfundi Blönduósbæjar í gær voru lagðar fram og samþykktar tvær bókanir sem snúa að innviðum samfélagsins. Í þeirri fyrri er komið á framfæri sérstökum þökkum til allra viðbragðsaðila sem komu að rútuslysinu við bæinn Öxl þann 10. janúar síðastliðinn við mjög erfiðar aðstæður. Þá er bæjarbúum öllum sem og öðrum sjálfboðaliðum sem komu að málum, með beinum eða óbeinum hættið, þakkað fyrir ómetanlegt framlag sitt við að taka á móti allt að 90 einstaklingum sem lentu í slysinu.

„Það er gott að búa í samfélagi sem stendur saman þegar á reynir, gengur í það sem gera þarf til þess að hjálpa þeim sem þess þurfa,“ segir í bókun sveitarstjórnar og ítrekar hún af þessu tilefni þá sjálfsögðu kröfu að Blönduósflugvelli verið haldið við sem sjúkraflugvelli vegna mikilvægrar legu hans við þjóðveg eitt. Flugvöllurinn verði að vera búinn þeim aðbúnaði sem sé nauðsynlegur til að hann geti þjónað íbúum svæðisins og þeim fjölmörgu vegfarendum sem um landshlutann fara.

Í seinni bókun sveitarstjórnar er lýst yfir stuðningi við frumvarp til laga um endurgreiðslur til félagasamtaka til almannaheilla vegna mannvirkjagerðar og annarra framkvæmda. Sveitarstjórn skorar á önnur sveitarfélög og alþingismenn alla að beita sér fyrir því að frumvarpið verði sem fyrst að lögum, þar sem það mun lyfta grettistaki í uppbyggingu innviða björgunarsveita og annarra félagasamtaka um land allt.

Sjá nánar fundargerð sveitarstjórnar Blönduósbæjar hér.