Reiðhöllin í Arnargerði á Blönduósi á 20 ára afmæli 11. mars næstkomandi. Að því tilefni stendur til að bjóða félagsmönnum í Hestamannafélaginu Neista að koma saman og eiga góð stund á afmælinu. Þann dag standa einnig vonir til að hægt verði að taka formlega í notkun endurbættan sal reiðhallarinnar. Stjórn Neista vinnur nú að skipulagningu þessa verkefnis og óskar eftir aðstoð frá félagsmönnum, sem og öðrum, sem eru tilbúin að aðstoða við að koma reiðhöllinni í betra horf. „Það er mikið verk fyrir höndum og verður fyrsta vinnuhelgi í reiðhöllinni 29. febrúar - 1. mars“, segir á vef Neista.

Félagsmenn eru beðnir að hafa samband við stjórnarmeðlimi til að bjóða fram krafta sína. Það verður séð til þess að vinnuhelgin verði ekki síður skemmtileg en gagnleg. Þar sem hestamannafélagið hefur lítið fjármagn þá er leitað eftir styrkjum til að fjármagna verkefnið. „Ef félagsmenn hafa hugmyndir að því hvert sé hægt að sækja styrki, eða geta aðstoðað við að afla styrkja, þá má gjarnan hafa samband við stjórn Neista.“

Einnig vantar umtalsvert af húsgögnum og húsbúnaði í salinn í reiðhöllinni. Ef einhverjir eru að skipta út og mega sjá af slíku (eða láta fyrir lítið) þá þiggur Neisti það með þökkum. Það sem helst vantar er:

• Sófi
• Sófaborð
• Sjónvarp
• Hitablásari
• Borð og stólar
• Bókahillur
• Lokaðir skápar/hirslur
• Skóhillur
• Fatahengi
• Ísskápur
• Uppþvottavél
• Vegghillur
• Ýmis eldhúsbúnaður s.s. eldhúsföt, kökudiskar, vatnskönnur, kökuspaðar og fl.
• Ryksuga
• Skúringa- og hreingerningabúnaður
• Handlaugar
• Salerni
• Speglar

Stórsýning austur-húnvetnskra hestamanna
Stórsýning austur-húnvetnskra hestamanna verður haldin með pompi og prakt 22. apríl og standa vonir til að reiðhöllin verði þá búin að fá nauðsynlegt viðhald og endurbætur. „Það hefði lítið farið fyrir félagsstarfi Hestamannafélagsins Neista undanfarin ár ef reiðhallarinnar nyti ekki við og því er mjög mikilvægt fyrir hestamennsku á svæðinu, að stuðla að endingu hennar,“ segir á vef Neista.