Fréttir | 28. apríl 2020 - kl. 09:22
Heimsóknir leyfðar á HSN á Blönduósi með ákveðnum takmörkunum frá og með 4. maà nk.
Heimsóknir verða leyfðar inn á Heilbrigðisstofnunina á Blönduósi frá og með 4. maí næstkomandi með ákveðnum takmörkunum. Þó mikið hafi áunnist í baráttunni gegn COVID-19 erum við ekki komin í höfn og sýna þarf ítrustu varkárni og virða sóttvarnaráðstafanir í heimsóknum. Einnig er nauðsynlegt að takmarka þann fjölda sem kemur inn í heimilið á hverjum tíma. Vonir eru bundnar við að heimsóknir verði rýmkaðar enn frekar í júní 2020.
Vinsamlega kynnið ykkur vel eftirfarandi heimsóknarreglur:
- Ekki panta heimsóknartíma og alls ekki koma í heimsókn ef:
- Þú ert í sóttkví
- Þú ert í einangrun eða að bíða eftir niðurstöðu úr sýnatöku
- Þú hefur verið í einangrun og ekki eru liðnir 14 dagar frá útskrift.
- Þú ert með einkenni (kvef, hósta, hita, höfuðverk, beinverki, þreytu, kviðverki, niðurgang o.fl.).
- Heimsóknartími er frá kl: 13:00-16:00 alla daga
- Hafið samband í síma 455-4141/455-4142 og pantið heimsóknartíma. Heimild til heimsókna verður einu sinni í viku í eina klukkustund í senn sem veitt verður frá 4. maí. Einungis má einn aðstandandi koma. Ef vel gengur í baráttunni við veiruna, verður tíðni heimsókna aukin.
- Við hvetjum ykkur til að hlaða niður í símana ykkar smitrakningnarappi almannavarna Rakning C-19 fyrir 4. maí
- Hinkrið eftir starfsmanni við lyftu á heilsugæslu A inngang (deild 1) eða lyftu við B inngang (deild 2) hann fylgir ykkur til íbúa. Munið að þvo og/eða spritta hendur áður en heimsókn hefst og að henni lokinni. Ekki koma við neitt í almannarýmum, farið beint inn til íbúa og beint út aftur.
- Athugið að heimsóknin er til ættingja þíns, staldrið ekki við til að ræða við aðra íbúa, ættingja eða starfsfólk.
- Almennt er ekki gert ráð fyrir að börn og ungmenni (yngri en 14 ára) komi í heimsókn. Börn (14-18 ára) geta komið í heimsókn ef þau eru nánasti aðstandandi og koma þá einsömul.
- Virðið 2ja metra regluna og forðist snertingu við íbúa eins og hægt er.
ATHUGIÐ: Ef smit vegna COVID-19 aukast aftur, eða smit vegna annarra smitsjúkdóma, munu tilslakanir á heimsóknarbanni ganga til baka og reglur verða hertar á ný.