Undanfarin ár hefur Textílmiðstöð Íslands haldið Prjónagleði aðra helgina í júní á Blönduósi en laugardagurinn sá er alþjóðlegi prjónadagurinn. Vegna kórónuveirunnar var ekki annað í stöðunni en að fresta hátíðinni og verður hún haldin 11.-13. júní að ári. Hlökkum við til að sjá sem flesta þá.

Ekki þýðir að leggja upp laupana eða prjónana þrátt fyrir þetta og var því ákveðið að halda prjónasamkeppni eins og árin á undan. Eftir ýtarlega umhugsun var þemað „Blanda“ fyrir valinu. Nú  átti að prjóna „höfuðfat“ og átti það að vísa til árinnar okkar sem rennur svo tignarlega til sjávar. Íslenskt ullarband varð að vera í prjónlesinu og auðvitað mátti uppskriftin ekki hafa birst áður.

Þegar byrjað var að undirbúa samkeppnina var strax ákveðið að hafa þetta eins einfalt í vinnslu og hægt er og þar af leiðandi sendu allir þátttakendur myndir inn til Textílmiðstöðvarinnar í stað þess að senda sjálft prjónlesið. Myndunum var blandað af handahófi og ein mynd birt á Facebook síðu Prjónagleðinnar á hverjum degi yfir ákveðið tímabil en undir lokin birtust tvær myndir. Í dag, miðvikudag 10. júní, er búið að birta allar myndirnar. Allan tímann hefur fólk geta sett „like“ á þær myndir sem þeim finnast fallegastar og þetta mun vera hægt fram á föstudag, 12. júní. 

Á laugardaginn verður tilkynnt á Facebook hverjir vinningshafarnir eru. Hvetjum við fólk til að segja frá þessari samkeppni til að sem flestir geti tekið þátt.