Tryggvi er orðinn þjálfari Kormáks Hvatar. Mynd: Aðsend.
Fréttir | 24. febrúar 2021 - kl. 21:15
Stjórn knattspyrnudeildar Kormáks Hvatar hefur ráðið Tryggva Guðmundsson sem þjálfara meistaraflokks liðsins. „Hér er um hvalreka fyrir húnvetnskt íþróttalíf að ræða, þar sem ferilskrá Tryggva er löng og glæsileg,“ segir í tilkynningu frá stjórninni. Tryggi var markahæsti leikmaður allra tíma í deildarkeppnum á Íslandi, á tugi landsleikja að baki og spilaði með góðum árangri í sterkum liðum í atvinnumennsku erlendis.
Í tilkynningunni segir að Tryggvi og stjórn knattspyrnudeildarinnar hafi sameiginlega sýn á sumarið. Eftir tvö sumur í röð þar sem Kormákur Hvöt festi sig í sessi sem eitt af betri liðum deildarinnar, unnu sinn riðil og komust alla leið að lokaleiknum um sæti í þriðju deild, þá sé það kýrskýrt markmið að klára málið í sumar. „Við ætlum að leika í þriðju deild sumarið 2022.“
Tryggvi verður í sumar búsettur á Bönduósi og hefur þegar tekið til starfa. Fyrsti leikur Kormáks Hvatar á vorönn verður gegn Knattspyrnufélagi Breiðholts og fer fram laugardaginn 6. mars.