103. ársþing USAH var haldið 24. mars sl. á Húnavöllum. Ársþingið var ársþing tveggja ára en ekki tókst að halda það á síðasta ári sökum ástandsins í landinu þ.e. Covid-19. Litlu munaði að ekkert yrði af þinginu þennan veturinn eða því yrði frestar en hertar samkomutakmarkanir tóku gildi daginn eftir þingið og því hefði þurft að fresta því enn eina ferðina eða halda það á netinu.

Starfsemi sambandsins var með nokkuð hefðbundnum hætti árin 2019 og 2020 en þó hafði heimsfaraldurinn nokkrar breytingar í för með sér í starfsemina líkt og hjá öðrum íþróttafélögum í landinu. Á þinginu var kosin ný stjórn en í henni sitja Rúnar Aðalbjörn Pétursson, Guðmann Jónasson, Auður Ingimundardóttir, Baldur Magnússon og Eyþór Franzson Wechner. Rúnar A. Pétursson er formaður USAH.

Hvatningarverðlaun USAH voru afhent Golfklúbbnum Ós fyrir ört vaxandi starf og verkefni sem höfða til barna og unglinga. Var það formaður klúbbsins, Jóhanna Guðrún Jónasdóttir sem tók á móti þeim verðlaunum.

Þar sem ekkert þing fór fram á síðasta ári fór kosning fyrir Íþróttamann ársins fyrir tvö ár fram á dögunum. Fjórir íþróttamenn voru tilnefndir bæði árin en stjórnarmenn í aðildarfélögum sambandsins og stjórnarmenn sambandsins höfðu kosningarétt. Fyrir árið 2019 varð fyrir valinu Bergrún Ingólfsdóttir frá Hestamannafélaginu Neista og fyrir árið 2020 varð fyrir valinu Snjólaug María Jónsdóttir frá Skotfélaginu Markviss. Hvorug þeirra var á þinginu og því fengu þær sín verðlaun afhent eftir þingið.

Þá var samkvæmt venju kosið í nokkrar nefndir og störf hjá sambandinu og helst er frá því að segja að tveir ritnefndarmenn Húnavökuritsins létu af störfum eftir langa setu þar en það voru þeir Jóhann Guðmundsson og Ingibergur Guðmundsson. Jóhann hafði verið í ritnefnd í 50 ár en Ingibergur í 37 ár og nú síðast sem ritstjóri. Í stað þeirra komu þau Magdalena Berglind Björnsdóttir og Rúnar Aðalbjörn Pétursson en fyrir voru þau Magnús B. Jónsson, Guðmundur Unnar Agnarsson, Þórhalla Guðbjartsdóttir, Jóhanna Helga Halldórsdóttir og Páll Ingþór Kristinsson.

Húnavökuritið hefur verið gefið út sleitulaust frá árinu 1961 og verður því 60 ára í ár. Húnavakan eins og ritið er kallað er hafsjór af upplýsingum um líf og störf Austur Húnvetninga. Margir þjóðkunnir einstaklingar hafa skrifað sögur, vísur eða frásagnir í Húnavökuna. Húnavakan er full af lifandi frásögnum, sögum, kveðskap og myndum.

Fá dæmi eru til um samtímarit sem gefin eru út á Íslandi sem er svo vandað eins og Húnavakan er. Ungmennasamband Austur Húnvetninga hefur verið útgefandi af Húnavökuritinu frá upphafi og á flest alla árganga til á lager fyrir þá sem hafa áhuga á því að kaupa ritið. Þá er einnig hægt að gerast áskrifandi af Húnavökunni. Húnavakan kemur út á vordögum ár hvert og er óhætt að segja að hinn tryggi lesendahópur ritsins bíði ávalt spenntur eftir útgáfu degi ritsins.