Samtök sveitarfélaga á Norðurlandi vestra hafa ráðið sumarstarfsmann sem starfa mun við glatvarmaverkefni við gagnaverið á Blönduósi. Verkefnið hlaut nýverið styrk frá umhverfis- og auðlindaráðuneytinu og miðar að því að finna leiðir til að nýta varma sem frá gagnaverinu kemur til verðmætasköpunar. 

Starfsmaðurinn heitir María Dís Ólafsdóttir og hefur hún lokið MS gráðu í lífverkfræði frá Háskóla Íslands. María Dís, sem hóf störf í síðasta mánuði, mun safna gögnum til greiningar á neyslu á matvælum á svæðinu og á landsvísu, jafnframt greina neyslubundið kolefnisspor matvæla úr ylrækt á svæðinu. Hún mun líka skoða hvað mögulegt er að framleiða mikið að matvælum miðað við gefnar forsendur um nýtanlegan glatvarma frá gagnaverinu á Blönduósi og hvað gæti verið hagkvæmast að rækta.

“Við erum gríðarlega ánægð að fá Maríu Dís til liðs við okkur í þetta spennandi verkefni á Blönduósi og vonumst til að geta nýtt niðurstöður úr hennar vinnu til enn frekari framgangs á glatvarmaverkefninu við gagnaverið, nýtt þá orku sem þar fer til spillis enn betur og um leið aukið á sjálfbærni svæðisins,“ segir Magnús Jónsson, verkefnastjóri fjárfestinga hjá SSNV á vef samtakanna.

Tengdar fréttir:

Heitt loft frá gagnaverinu gæti nýst til ylræktar 

SSNV hlýtur styrk til að meta eiginleika og nýtingu glatvarma í gagnaverinu á Blönduósi