Ég hef velt því fyrir mér hvort frambjóðendur flokka til alþingiskosninga hafi ekkert að fram að færa eða að segja við kjósendur í Húnavatnssýslum. Margir hafa tekið eftir því að óvenju fáir pistlar eða greinar hafa birst frá frambjóðendum á Húnahorninu, þessum 20 ára gamla fréttavef sem er sá eini í Húnavatnssýslum. Alls eru pistlarnir fimm í þessum mánuði þegar þetta er skrifað, degi fyrir kosningar, og þar af eru þrír pistlar frá Lilju Rafneyju Magnúsdóttur. Hinir tveir eru frá Bjarna Jónssyni og Högna Elfari Gylfasyni.

Hvernig stendur á þessari þögn frá frambjóðendum, eða halda þeir að allir séu alltaf á Facebook og að það sé nóg að kosningabaráttan fari þar fram? Ég skoðaði á vef Húnahornsins að pistlarnir fyrir síðustu alþingiskosningar 2017 voru fimmfalt fleiri þá en nú og komu frá flestum flokkum. Ekki geta flokkarnir sagt að þeir viti ekki af þessum miðli því mér sýnist þeir flestir hafa keypt þar auglýsingapláss og eru því vel meðvitaðir um hann. Eða er það kannski raunin að flokkarnir halda að það sé nóg að auglýsa með yfirborðslegum hætti málefnin, að það sé óþarfi að ræða þau og kynna af einhverri dýpt við kjósendur sína. Þá fara þeir villur vegar.

Það hefur verið sérlega skemmtilegt að lesa pistla, eða þætti Jóns Torfasonar sem birtir eru á Húnahorninu. Alls eru þættirnir orðnir tíu talsins og heita Þættir úr sögu sveitar. Í þáttaröðinni birtir Jón þætti úr sögu Torfalækjarhrepps frá lokum 18. aldar og fyrri hluta 19. aldar. Þá voru í hreppnum 20 jarðir þar sem auk húsbænda var margt vinnufólk og einnig húsfólk. Í þáttunum er saga þessara jarða og þess fólks sem þar lifði rakin lítillega. Einstaklega fróðleg og skemmtileg lesning og hvet ég lesendur Húnahornsins til þess að skoða þættina.

Það vekur furðu margra að ráðningarbann hjá Biskupsstofu geri það að verkum að ekki sé hægt að auglýsa og ráða í stöðu sóknarprests í Þingeyraklaustursprestakalli. Sr. Sveinbjörn R. Einarsson, sem gengt hefur stöðunni var ráðinn til annarrar sóknar og sr. Bryndís Valbjarnardóttir á Skagaströnd hefur verið settur sóknarprestur ótímabindið í hlutastarf til að þjóna íbúum prestakallsins. Sóknarnefndir Þingeyraklaustursprestakalls hafa mótmælt þessum ráðahag. Skýringa Biskupsstofu er áðurnefnt ráðningarbann og að því verði aflétt á næsta kirkjuþingi í lok næsta mánaðar. Við vonum það besta.

Spennandi verkefni er að hefjast í hlíðum Spákonufells. Skógræktin og One Tree Planted ætla að gróðursetja þar 180 þúsund trjáplöntum á næstu árum og í kjölfarið mun þar vaxa upp skógur sem meðal annars á að nýtast íbúum Skagastrandar, nágrönnum þeirra og gestum til útivistar. Verkinu á að ljúka haustið 2024. Nú þegar hefur verið gróðursett í um 25 hekturum á þessu svæði, sem er í eigu Sveitarfélagsins Skagastrandar. Framtíðarskógurinn á að vera blandskógur með birki, sitkagreni og alaskaösp. Framlag One Tree planted til verkefnisins nemur um tæplega 20 milljónum króna.

Kjósum rétt og vel um helgina!

Góðar stundir
Nöldri