Á fundi sveitarstjórnar Húnavatnshrepps í gær var ákveðið að úthluta styrkjum til hinna ýmsu aðila. Hæsta styrkinn fær sóknarnefnd Þingeyraklausturskirkju, allt að 500 þúsund krónur, vegna sumaropnunar kirkjunnar á næsta ári. Ungmennasamband Austur-Húnvetninga fær 450 þúsund vegna starfsemi sambandsins árið 2022 og Björgunarfélagið Blanda fær 400 þúsund vegna endurnýjunar á snjósleðum á þessu ári.

Karlakór Bólstaðarhlíðarhrepps fær 300 þúsund krónur í styrk vegna verkefna félagsins á næsta ári og Hestamannafélagið Neisti fær jafnháa fjárhæð í styrk vegna æskulýðsstarfs árið 2022. Ungmennafélagið Geislar fá 280 þúsund í styrk vegna verkefna félagins á næsta ári og reiðveganefnd Hestamannafélagsins Neista fær 200 þúsund króna fjárstuðning vegna gerð reiðvega.

Körfuboltaskóli Norðurlands og Félag eldri borgara í Húnaþingi fá 100 þúsund krónur hvort aðili vegna starfsemi þeirra á næsta ári. Jólasjóður A-Hún. fær sömu fjárhæð í styrk. Ungmennafélag Bólstaðarhlíðarhrepps færi 120 þúsund krónur í styrk, Stígamót 50 þúsund og AA samtökin á Blönduósi fá 40 þúsund. Þá var samþykkt að greiða svokallað vildargjald til Farskólans að fjárhæð 79 þúsund.