Stéttarfélögin Aldan, Kjölur, Samstaða, Sameyki og Verslunarmannafélag Skagafjarðar bjóða félagsmönnum sínum á tíu námskeið, þeim að kostnaðarlausu. Námskeiðin eru haldin á vegum Farskólans á Norðurlandi vestra en þau eru öllum opin og geta aðrir en félagsmenn þessara félaga kannað rétt sinn hjá sínu stéttarfélagi.

Námskeiðin eru:

Að varða veginn fyrir þitt besta ár – Vefnámskeið tvískipt

Norðurljós – Tungl og Stjörnur – Vefnámskeið

Persónuleg fjármál – Vefnámskeið

Heilaheilsa og þjálfun hugans – Vefnámskeið tvískipt

Bakstur á súrdeigsbrauði

Fjármál við starfslok- Vefnámskeið

Hvort viltu vera gleðigjafi eða fýlupoki? – Vefnámskeið

Ræktun matjurta – Vefnámskeið

Meðvirkni og uppvöxtur- Vefnámskeið

Útisvæði og aðkoma að heimilinu – Vefnámskeið

Farsæl samvinna Farskólans og stéttarfélaga
Á vef Farskólans kemur fram að skólinn hafi frá árinu 2013 verið í afar skemmtilegu og farsælu samstarfi við stéttarfélög um fræðslu og án efa megi finna dæmi um samstarf lengra aftur.

„Samstarfið árið 2013 hófst með því að Farskólinn hélt stök námskeið fyrir félagsmenn einstakra félaga og einnig á ákveðnum vinnustöðum. En fljótlega þróaðist samstarfið og haustið 2014 sameinuðu félögin Kjölur, Sameyki (þá SFR) og Samstaða krafta sína og buðu sameiginlega upp á námskeið fyrir sína félagsmenn. Fljótlega bættist Aldan við og síðan Verslunarmannafélag Skagafjarðar.

Á þeim tíma sem liðinn er  hefur þetta samstarf um framboð á fræðslu aukist og styrkst. Vorið 2020 kom systurstofnun Farskólans á Eyjafjarðarsvæðinu, SÍMEY,  inn í samstarfið og þá bættist stéttarfélagið Eining Iðja, sem er nokkurs konar ,,Aldan/Samstaða“ þeirra Eyfirðinga í hópinn.  Frábær vítamínsprauta og hefur samstarfið verið afar farsælt. Á þessum tíma hefur, eins og gefur að skilja, verið boðið uppá ýmislegt fróðlegt og skemmtilegt og fjöldi námskeiða farin að telja í hundruðum. Við í Farskólanum erum afskaplega þakklát og ánægð með þetta frábæra samstarf og fylgjumst spennt  með vexti þess og auknum styrk á næstu misserum.“