Fréttir | 20. janúar 2022 - kl. 11:13
Sveitarstjórn Skagastrandar hvetur sjávarútvegs- og landbúnaðarráðherra til að hverfa frá 1.500 tonna niðurskurði aflaheimilda til strandveiða á árinu. Sveitarstjórn telur að embættisverk ráðherra ættu að miða að því að tryggja strandveiðiflotanum nægar heimildir til þess að stunda veiðar 48 daga á ári enda myndi slíkt styrkja sjávarbyggðir um land allt.
Þetta kemur fram í bókun sveitarstjórnar frá fundi sínum í gær. Í henni kemur fram að á síðasta fiskveiðiári hafi 34 bátar landað strandveiðiafla á Skagaströnd og hafi hann numið um 613 tonnum eða um 5% strandveiðiafla á landinu öllu. Umtalsverð nýliðun hafi átt sér stað innan smábátaútgerðar á Skagaströnd á undanförnum árum sem tengja megi beint við strandveiðikerfið.
Svandís Svavarsdóttir, sjávarútvegs- og landbúnaðarráðherra hefur að undanförnu verið gagnrýnd af strandveiðisjómönnum fyrir að láta skert aflamark í þorski verða til þess að 15% skerðing verði á aflaheimildum sem ætlað er strandveiðum. Í fyrra var veiðunum veittar heimildir fyrir 10.000 tonnum af þorski en í ár verða það að óbreyttu 8.500 tonn.