Sporðaköst, veiðivefur mbl.is, segir frá því að tilboð í Víðidalsá hafi verið opnuð í gær og að tilboð hafi borist frá fimm aðilum. Samkvæmt heimildum vefsins er leiguverð Víðidalsár nú í kringum 80 milljónir króna á ári en nokkur tilboðanna í gær voru vel yfir 100 milljónir og hæsta boð hljóðað upp á 115 milljónir á ári. Ljós sé því að leiga fyrir veiðiréttindi í Víðidalsá muni hækka um tugi milljóna króna.

Á vefnum kemur fram að hæsta tilboðið hafi verið frá núverandi leigutökum sem eru Starir ehf. í samstarfi við landeigendur sem kenndir eru við Stóru-Borg í Víðidal. Starir hafa verið með ána á leigu frá árinu 2014 en nýr samningur á að taka gildi næsta sumar.

Boðinn var út veiðiréttur í Víðidalsá sem samanstendur af átta stöngum á laxasvæðinu í Víðidalsá og hliðaránni Fitjaá. Þá er þrjár stangir á neðsta hluta árinnar sem flokkast sem silungasvæði. Loks var veiðiréttur í Hópinu hluti af útboðinu. Óskað var eftir tilboðum í svæðið til fimm ára. Tvö veiðihús eru jafnframt hluti af leigunni. Annars vegar Tjarnarbrekka sem hýsir veiðimenn á laxasvæðinu og veiðihúsið Þúfa sem er aðstaða fyrir veiðimenn á silungasvæðinu.

Sporðaköst ræddi við Björn Magnússon, bónda á Hólabaki og formann veiðifélagsins, og segist hann verða ánægður með tilboðin sem bárust. Ljóst sé að þau hljóði upp á mikla hækkun til landeigenda eða sem nemur tugum milljónum króna á ári. Að sama skapi sé ljós að hækkun á veiðileyfum í Víðidalsá verði mikil. Björn átti von á fleiri tilboðum en er ánægður með þau sem bárust. Segir hann að veiðifélagið muni nú taka sér tíma til að fara yfir tilboðin og ræða við þá sem buðu áður en félagsfundur verður kallaður saman til að kjósa um tillögu stjórnar.

Laxveiði í Víðidalsá hefur sveiflast nokkuð síðustu ár. Alls veiddust 810 laxar í fyrra en árið á undan voru þeir 737. Árið 2020 veiddust 546 laxar í ánni og 2019 voru þeir 430. Ef horft er til síðustu tíu ára veiddist mest í ánni árið 2015 eða 1.626 laxar. Meðalveiði síðustu tíu ára í Víðidalsá eru 826 laxar.