Lögreglan á Norðurlandi vestra, ásamt Menntasetri lögreglunnar, hefur undanfarna mánuði tekið þátt í lögregluhunda verkefni ásamt pólsku lögreglunni. Verkefnið gengur undir vinnuheitinu „K9 Europe“ og fjallar um þjálfun og notkun lögregluhunda. Í desember síðastliðnum komu tíu lögreglumenn frá Póllandi til Íslands og kynntu sér starfsemi löggæsluhunda og tókst sú heimsókn með ágætum, að því er fram kemur í facebooksíðu Lögreglunnar á Norðurlandi vestra.

Í síðustu viku sóttu svo tíu hundaþjálfarar lögreglu, tollgæslu og Fangelsismálastofnunar, auk fulltrúa Menntaseturs lögreglunnar Pólverja heim. Í facebookfærslu lögreglunnar segir að móttökurnar sem hópurinn fékk hafi verið sérlega góðar.  

Þar segir einni: „Samstarf sem þetta er mikilvægt fyrir starfsemi lögreglunnar ekki síst m.t.t. framþróunar. Í Póllandi eru starfræktir fimm lögregluskólar og heimsótti hópurinn m.a. einn þeirra skóla. Þar voru nemendur um eitt þúsund talsins og var aðstaða þar öll eins og best verður á kosið. Þá var sóttur heim hundaskóli lögreglunnar en þar eru að jafnaði fimmtíu til eitt hundrað nemendur í senn ásamt hundum. Það hefur sýnt sig í umræddu verkefni að við getum lært margt af pólsku starfssystkinum okkar og eins þau af okkur og er markmiðið m.a. að deila þekkingu og reynslu í þeirri von að efla enn frekar starf löggæsluhunda landanna. 

Margir kunna að halda að löggæsluhundar nýtist einvörðungu til að finna fíkniefni og sprengiefni. Því fer hins vegar fjarri því í löndunum í kringum okkur þá eru hundar nýttir í svo mikið meira er snýr að löggæslu, eins og valdbeitingu, mannfjöldastjórnun, lífsýnaleitir, spor og -víðavangsleitir, leitir af tölvuíhlutum (minniskortum og fl.) og margt fleira. Vonandi munu aukin og fjölbreytt verkefni felast í framtíð löggæsluhunda á Íslandi. Verkefnið „K9 Europe“ mun halda áfram og fyrirhugaðar eru fleiri heimsóknir og vinnulotur á næstu misserum.“