Á landsfundi LEB sem haldinn var í Borgarnesi 9. maí sl. var kosið um formann og tvo í stjórn LEB til tveggja ára; þrjá í varastjórn til eins árs, skoðunarmenn og vara skoðunarmenn reikninga til eins árs.

Hefð er fyrir því að varastjórn sitji alla stjórnarfundi með málfrelsi og tillögurétt.

Tillaga uppstillingarnefndar vegna þessara kosninga, var samþykkt einróma:

Formaður – til 2ja ára
Helgi Pétursson kosinn fyrst 2021

Stjórn kosin – til 2ja ára
Drífa Sigfúsdóttir Reykjanesbær, kosin fyrst 2021
Þorbjörn Guðmundsson Reykjavík, kosinn fyrst 2021
(Sigrún C. Haldórsdóttir Ísafjörður kosin 2022)
(Ingibjörg Sverrisdóttir Reykjavík kosin 2020/2022)

Varastjórn – til 1 árs allir
Ásgerður Pálsdóttir   Geitaskarði /Blönduós kosin fyrst 2022
Jónas Sigurðsson Mosfellsbær kosinn fyrst 2022
Magnús Jóhannes Magnússon Selfoss Nýtt framboð

Skoðunarmenn reikninga – til 1 árs
Ástbjörn Egilsson
Hildigunnur Hlíðar

Vara skoðunarmenn reikninga – til 1 árs
Guðrún Ágústsdóttir
Sverrir Kaaber

Ályktun Landsfundar LEB 2023 um kjaramál:

Eldra fólk getur ekki beðið lengur. Nú verður að hefjast handa.

Landssamband eldri borgara lýsir yfir miklum vonbrigðum með aðgerðaleysi ríkisstjórnarinnar í kjaramálum eldra fólks. Þrátt fyrir yfirlýst markmið í stjórnarsáttmálanum og kosningaloforð um að draga úr skerðingum og jaðarsköttum, hafa efndir engar orðið. Í drögum að fjármálaáætlun fyrir árin 2024-2028 eru engin fyrirheit um lagfæringar á kjörum eldra fólks.

Í hópi eldra fólks er fjöldi sem býr við óásættanleg kjör sem fara nú síversnandi í stjórnlausri óðaverðbólgu. Landsfundur LEB 2023 krefst þess að strax verði gripið til aðgerða til að rétta hlut eldra fólks og hafin verði vinna við að draga úr skerðingum í almannatryggingakerfinu.

Ályktun Landsfundar LEB 2023 um húsnæðismál:

Ályktun LEB um húsnæðismál

Á síðustu áratugum hefur eldra fólki farið fjölgandi og allt bendir til að sú þróun haldi áfram. Mikilvægt er að taka mið af þessari þróun m.a. við skipulagningu og uppbyggingu íbúðahúsnæðis. Vel staðsettir íbúðakjarnar sem byggðir eru með þarfir eldra fólks gerir því mögulegt að búa lengur í sjálfstæðri búsetu.

Landsfundur eldri borgara 2023 varar við því andvaraleysi sem nú ríkir og krefst þess að tekið verði tillit til þarfa eldra fólks við mótun húsnæðisstefnu og beinir því til sveitarfélaga að þau tryggi við skipulagningu nýrra byggingasvæða, uppbyggingu húsnæðis og þjónustu fyrir eldra fólk.