Lilja Dögg Alfreðsdóttir, menningar- og viðskiptaráðherra, úthlutaði í gær úr Framkvæmdasjóði ferðamannastaða fyrir árið 2024. Alls bárust 125 umsóknir um styrki, fyrir rúmlega 2,9 milljarða króna, til verkefna að heildarfjárhæð rúmlega 4 milljarða. Að þessu sinni hljóta 29 verkefni styrk úr sjóðnum, samtals að fjárhæð 538,7 milljónir króna, og dreifast þau um land allt. Tvö verkefni í Austur-Húnavatnssýslu fengu styrk.

Skagabyggð fékk 3,6 milljónir til verndunar Kálfshamars á Skaga og Sveitarfélagið Skagaströnd fékk 41,1 milljón fyrir verkefnið Spákonufellshöfði – aðgengi fyrir alla.

Tveir hæstu styrkirnir í ár eru að upphæð 90 milljónir króna hvor, og fara þeir annars vegar til áframhaldandi uppbyggingar við Stuðlagil á Austurlandi og hins vegar til uppbyggingar gönguleiðar og áningarstaðar á vegum Sveitarfélagsins Hornafjarðar við Múlagljúfur á Suðurlandi. Þriðji hæsti styrkurinn, rúmar 52 milljónir króna, fer til Vesturlands, þar sem um er að ræða uppbyggingu áningarstaðar með aðgengi fyrir alla við Kúalaug í Reykhólahreppi.

Verndun Kálfshamars
Styrkurinn er veittur til að hnitsetja, merkja, smiðja og setja niður tréstíga í samræmi við deiliskipulag a svæðinu. Markmið verkefnisins eru að bæta aðgengi að Kálfshamarsvík, þar sem er að finna stuðlabergsmyndanir og minjar um eyðiþorp. Hnitsetja þannig göngustíga á 3 km kafla, greina innviðaþörf, stika með lerkistikum, og setja niður innviði til að auðvelda göngu um svæðið. Verkefnið er á áfangastaðaáætlun Norðurlands og fellur mjög vel að markmiðum sjóðsins um náttúruvernd og öryggi.

Spákonufellshöfði
Styrkurinn er veittur til að útbúa göngustíg með aðgengi fyrir alla frá bílastæði við Einbúastíg að útsýnispalli. Stígurinn er 320m og fylgir reglum um algilda hönnun. Við enda stígsins verður komið upp skilti skv. Vegrúnu með fræðslu um gamla bryggju sem útsýnispallurinn stendur á og önnur iðnaðarmannvirki sem áður stóðu á höfðanum. Við gerð stígsins verður eldri stígur í halla ofar í landslaginu lagður niður og verður gamalt malarplan afmáð og náttúrulegt landslag endurheimt.

Um er að ræða þriðja áfanga í uppbyggingu aðstöðu til útivistar við Spákonufellshöfða. Leggja á stíg sem fylgir reglum um algilda hönnun að útsýnispalli. Við gerð stígsins verður eldri stígur lagður af og náttúrulegt landslag endurheimt. Auk þess að gera umbætur á inngangi höfðans við Tjaldklauf. Með verkefninu eru eldri skemmdir á fólkvanginum lagfærðar og náttúrulegt landslag endurheimt.

Sjá nánar á vef Stjórnarráðsins.