Tæplega tveimur árum eftir að fyrsta skóflustungan var tekin, var komið að því að fyrstu gestirnir fengu að stinga sér til sunds að nýju í sundlaug á Blönduósi. Nýja sundlaugin var opnuð á Blönduósi í dag og voru það nemendur í 4.-6. bekk sem fengu að nota hana fyrst að vild fyrsta klukkutímann. Að því loknu var hún opin öðrum. Áætla má að rúmlega 200 manns hafi mætt á fyrsta opnunardegi laugarinnar.

Sundlaugin er 25 metra laug en að auki eru tvær stórar vatnsrennibrautir, ein lítil rennibraut, tveir heitir pottar og vaðlaug. Hönnuður sundlaugarinnar er Jón Guðmundsson arkitekt, en hann hannaði líka íþróttahúsið sem laugin stendur við.