Nýja sundlaugin okkar á Blönduósi hefur svo sannarlega slegið í gegn frá því að hún var opnuð fyrir fimm dögum síðan. Í samtali við Guðmund Haraldsson, forstöðumann Íþróttamiðstöðvarinnar, hafa bæjarbúar og aðrir gestir fjölmennt í sund og hafa hlutirnir gengið nokkuð vel fyrir sig þrátt fyrir nokkra hnökra í upphafi eins og gengur og gerist þegar svona stór mannvirki er opnað. Guðmundur tjáði Húnahorninu að frá opnun væru gestir sundlaugarinnar 2.760 talsins en á laugardeginum komu tæplega 1.300 manns í laugina.

Enn er nokkur vinna eftir við sundlaugina sjálfa og umhverfið í kring en stefnan er sett á að klára það fyrir formlega opnun sundlaugarinnar á Húnavöku dagana 16. – 18. júlí.