Fjögur sláturhús á Norður- og Austurlandi hafa stofnað fyrirtækið Iceland Byproducts til að fullvinna garnir til útflutnings. Norðlenska hafði forgöngu um stofnunina en einnig standa SAH Afurðir á Blönduósi, Fjallalamb á Kópaskeri og Sláturfélag Vopnfirðinga að fyrirtækinu, að sögn Norðlenska.

„Iceland Byproducts er stofnað í samvinnu við írska fyrirtækið Irish Casings og munu tveir starfsmenn frá Írlandi verða hér á landi í haust og hafa yfirumsjón með vinnslunni. Garnir hafa verið hálfverkaðar hérlendis og það verður gert áfram í einhverjum mæli í haust,“ segir í frétt Norðlenska.

Þar segir einnig að Reynir B. Eiríksson, framleiðslustjóri Norðlenska, vonist til þess að fleiri sláturleyfihafar leggi inn garnir til hins nýja fyrirtækis í framtíðinni til viðbótar við sláturleyfishafana sem eiga fyrirtækið.

„Garnirnar verða seldar til Egyptlands þar sem þær verða flokkaðar og síðan notaðar utan um pylsur af ýmsu tagi. Reynir gerir ráð fyrir að í haust verði unnar 240 til 250 þúsund garnir á Húsavík.

Hjá Iceland Byproducts verða einnig verkaðar vambir til útflutnings. Þær verða seldar til Gana og notaðar í súpur og annað slíkt. Norðlenska hefur undanfarið selt bein á svipaðar slóðir,“ segir ennfremur í frétt Norðlenska. Heimild: Mbl.is