Það var á haustmánuðum sem að við í Karlakór Bólstaðarhlíðarhrepps ákváðum að taka þátt í keppninni Kórar �slands sem að haldin er á Stöð 2 eins og kunnugt er. Við vorum ekki of bjartsýnir í fyrstu með að við næðum að safna liði í þetta verkefni en það leystist og það vel. Við tóku strangar æfingar og svo undankeppnin 8. október sl.

Það var mikil gleði í okkar herbúðum er við komumst áfram og ekki laust við að menn hafi fengið smá kusk í augun og fundist þeir "kóngar um stund". Við tók undirbúningur fyrir undanúrslitakvöldið sem haldið var sunnudaginn 5. nóvember sl. eins og flestum er kunnugt um,  og aftur komumst við áfram sem sigurvegarar símakosningarinnar og kórinn kominn í úrslit keppninnar sem haldin verða nk. sunnudag 12. nóvember.

Það er ekki einfalt að taka þátt í svona uppákomum fyrir lítinn kór norðan af landi eða svo sem hvaðan sem er af landinu. Því fylgir mikill kostnaður sem erfitt er að kljúfa. Því fór það svo að kórmenn hafa ferðast á einkabílum til og frá keppnisstað og enginn talið það eftir sér að gera það og tekið á sig allan kostnað.

Það sem að ég hef einnig tekið eftir er að þetta verkefni er mikil lyftistöng fyrir kórinn okkar og allir spenntir fyrir því að taka þátt. Andinn og stemningin er frábær. Karlakór Bólstaðarhlíðarhrepps er eini kórinn sem eftir er í keppninni af landsbyggðinni og finnst okkur dálítið mikið varið í það líka.

Nú eru úrslitin framundan og mikið þætti okkur vænt um ef að þeir sem að þetta lesa gætu hugsað sér að "splæsa" á okkur atkvæði ef að flutningur þess lags sem að við flytjum er þeim að skapi.

Annars viljum við þakka öllum þeim sem að lagt hafa okkur lið í haust við þátttöku okkar í Kórar �slands, hvort sem með atkvæðum eða með öðrum hætti

X-Karlakór Bólstaðarhlíðarhrepps.
Kosninganúmer í þetta skiptið er 900-9002

Höskuldur Birkir Erlingsson
Formaður