Mér finnst svo vonarríkt og gefandi að fá að upplifa þessa miklu vorsins vakningu sem orðin er að veruleika í umhverfis- og loftslagsmálum.

Að við séum nú loks í alvöru farin að velta sköpuninni fyrir okkur og virða hana eins og hún á skilið. Ganga ekki bara um hana á drullugum skónum og taka henni sem sjálfsagðri.

Að nú sé svo bara raunverulega komið að því að fólk almennt og stjórnvöld í ríkara mæli vilji taka höndum saman til þess að gera jörðina lífvænlegri, ekki síst til lengri tíma litið. Með því að hugsa um hvernig við umgöngumst hana þannig að við fáum notið hennar um leið og hún geti nýst okkur best á sem hagkvæmastan hátt og sem allra lengst. Með því að hlúa að henni, rækta hana, virða og ekki síst þakka fyrir hana. Því vissulega getum við sem mannkyn haft heilmikið um það að segja hvort hér verði lífvænlegt eitthvað lengur. Til dæmis með því að huga að því hvernig við lágmörkum losun gróðurhúsalofttegunda og með því að binda kolefni svo við komumst sem næst því að jafna kolefnissporið. Með aukinni og markvissri fræðslu um landgræðslu og skógrækt, endurheimt votlendis og svo framvegis.

Því er skipting orkugjafa bæði brýnt og spennandi verkefni og ber að fagna markmiðum um tímasetningar í því tilliti. Þá er gríðarlega áhugaverð vakningin um að tína upp rusl eða plokka eins og það er kallað, lágmarka plast í umferð og með flokkun hvers kyns íláta og sorps og urðun þess. Og þá ekki síst um það hvernig við umgöngumst hafið og þau verðmæti sem það hefur að geyma og getur gefið af sér með skynsamlegri nálgun og nýtingu. Með aukinni vitund um að sjórinn sé ekki öskuhaugar. Og með auknum rannsóknum á lífríki sjávarins og hvernig það hagar sér og þróast í breytilegum aðstæðum.

Aðgerðir sem sameina okkur

Trúverðugar áætlanir, markvissar árangursríkar aðgerðir í þessum efnum hafa alla burði til að sameina okkur sem þjóð fremur en sundra. Og ekki síður sem mannkyn sem hefur trú á lífinu. Á hinni fögru og dýrmætu sköpun Guðs sem hann fól okkur að gerast ráðsmenn yfir. Með því að rækta upp og hlúa að. Vernda, nýta og njóta okkur til heilla og blessunar, vonandi um mörg farsæl og heilladrjúg ókomin ár.

Andrúmsloftið skiptir máli

Það skiptir nefnilega máli hvers konar andrúmslofti við drögum að okkur og við lifum í. Andrúmslofið ásamt nauðsynlegri jarðrækt að ég tali nú ekki um mannrækt og eðlilegri trúrækt skipta okkur nefnilega verulegu ef ekki nánast öllu máli þegar kemur að tilveru okkar, velferð og líðan þegar upp er staðið.

Það eru því í mínum huga forréttindi að fá að fylgja þeirri köllun okkar eftir að vilja hlúa að sköpuninni svo hún fái notið sín með þeim hætti sem henni var og er ætlað. Okkur öllum til farsældar, gagns og ánægju. 

Hættum svo að drepa hvert annað

Hættum svo endilega sem mannkyn að ljúga, svíkja og pretta að ég tali nú ekki um að skera, stinga eða skjóta hvert annað. Lítilsvirða skoðanir, tala með óvirðingu um og/eða fara á bakvið eða baktala hvert annað.

Þá er aldrei að vita nema að okkur takist að lifa í sátt og samlyndi í þessum heimi í einhvern ljúfan, góðan og gefandi tíma til viðbótar.

Til þess hjálpi okkur kærleikans Guð, skapari alls sem er. Höfundur og fullkomnari lífsins sem er tilbúinn að fyrirgefa og reisa okkur upp að nýju með kærleika sínum og lífgefandi nærveru.

Með kærleiks- og friðarkveðju.

- Lifi lífið!

Höfundur er ljóðskáld og rithöfundur og aðdáandi lífsins.