Þann 7. september síðastliðinn gróðursettu nemendur Blönduskóla 600 krókusa í kirkjuhólinn við Blönduóskirkju. Þeim til aðstoðar voru: Þórhalla Guðbjartsdóttir skólastjóri, Snjólaug María Jónsdóttir garðyrkjunemi og Björk Bjarnadóttir brottfluttur Blönduósingur og umhverfis-þjóðfræðingur, auk þess aðstoðaði Páll Ingþór Kristinsson við undirbúning verksins. Veðrið var dásamlegt og hvert barn fékk að setja niður fjóra lauka í fimm afmörkuð hringlaga beð, ca 2 metra í þvermál. Tveir bekkir voru saman um hvert beð, en torfið var stungið lítillega upp með stunguskóflum og tveir laukar settir undir hvert torf. Bekkjunum var skipt upp í nokkra hópa og síðan var unnið með smá pásum frá klukkan 8:00 um morguninn til 14:00. Veðrið var dásamlegt, svalt en fagurt haustveður og allir skemmtu sér, ásamt því að læra um gróðursetningu á litlum haustlaukum og fræðast um eðli þeirra. Þar sem laukarnir eru fjölærir og fjölga sér þá verður hægt að sjá þá í blóma á hverju vori í marga áratugi og vonandi munu þeir gleðja bæjarbúa og gesti Blönduósbæjar með fegurð sinni og litadýrð. Laukarnir heita: Grand Maitre sem er fjólublár, Pickwick sem er ljós fjólublár, Jeannae d'Arc sem er hvítur og Yellow sem er gulur. Oftast byrja þeir að blómstra um miðjan mars og standa fram í apríl, þannig að þegar slá þarf grasið á kirkjuhólnum verða laukarnir búnir að blómstra og farnir að safna forða fyrir næsta vor.

Markmið verkefnisins er fjölþætt. M.a. að vekja áhuga barna og unglinga á að garðyrkja er eitthvað sem við öll getum gert og fyrsta skrefið í þá átt er oft að gróðursetja haustlauka. Einnig er markmiðið að gleðja augað og fræða fólk á Blönduósi sem og annars staðar um hve gaman og auðvelt sé að fegra umhverfi sitt. Að skilja eitthvað eftir sig sem blómstrar síðan á hverju vori, er fagurt og göfugt verkefni, sem mun vonandi vekja áhuga fólks á Blönduósi sem og annars staðar að gróðursetja lauka, blóm og tré. Ef mikið kemur upp með komandi vori er stefnan að halda áfram að setja niður haustlauka í kirkjuhólinn með nemendum Blönduskóla, helst þar til hóllinn er orðinn eitt krókusahaf. Við hvetjum alla til að fjárfesta í nokkrum haustlaukum og stinga þeim ofan í jörðina eða í potta heima hjá sér. Fátt er skemmtilegra en að sjá þessa litlu lauka stinga sér upp úr frosinni jörð þegar allir eru að bíða eftir komu vorsins.

Hvernig varð hugmyndin til?
Björk Bjarnadóttir umhverfis-þjóðfræðingur fékk hugmyndina af verkefninu vorið 2020 þegar hún dvaldi hjá foreldrum sínum um vorið og gekk mikið um bæinn með son sinn í barnavagni. Þá blasti kirkjuhóllinn við og fannst Björk hann hálf litlaus og sá að þarna væri svæði sem gaman væri að fegra með krókusum. Haft var samband við Blönduskóla og athugað hvort hann myndi vilja taka þátt í því. Tekið var vel í hugmyndina sem nú er orðin að veruleika.

Svona verkefni er ekki hægt að vinna hratt og örugglega nema að allir hjálpist að og allt sé vel skipulagt. Þar sem engin okkar hafði áður sett niður 600 krókusa voru fengin ráð frá nokkrum af starfsmönnum Grasagarðs Reykjavíkur, þeim Björk Þorleifsdóttur, Jónu Valdísi Þorleifsdóttur og Hirti Þorbjörnssyni sem er forstöðumaður Grasagarðsins. Er þeim sérstaklega þakkað fyrir öll góð ráð. Ráðleggingar þeirra gerðu verkefnið framkvæmanlegt sem og auðveldaði okkur að koma því af stað sem fyrst haustið 2020. Þá er Ólöfu Erlingsdóttur hjá Garðheimum þökkuð aðstoð við pöntun og innflutning á laukunum. Einnig þökkum við starfsmönnum áhaldahúss Blönduósbæjar. Ég sjálf, Björk vil þakka Þórhöllu fyrir jákvæð og góð viðbrögð við hugmynd minni. Meðfylgjandi eru nokkrar myndir frá niðursetningu laukanna sem teknar voru af Þórhöllu og Björk.

Haust- og krókusa kveðjur.

Björk Bjarnadóttir

að einnig þökkum við starfsmönnum áhaldahúss Blönduósbæjar