Frelsari þessa heims, Jesús Kristur, sem við mörg leggjum allt okkar traust á í blíðu og stríðu, í lífi sem dauða. Á hátíðunum í lífi okkar, sem og í hversdeginum og á sjúkrabeði og dauðastund gaf okkur nýtt boðorð sem full ástæða er til að skerpa á daglega og minna sig á hverja stund þegar kemur að samskiptum við fólkið okkar og þau önnur sem samferða okkur eru um stundar sakir á ævinnar göngu.

"Elskið hvert annað. Eins og ég hef elskað ykkur skuluð þið elska hvert annað. Á því munu allir þekkja að þið eruð mínir lærisveinar ef þið berið elsku til hvert annars."

Og þá höfum við það hversu einfalt eða flókið það kann nú að hljóma eða reynast.

Framtíðarsýn

Svo sagði Jesús við fylgjendur sína að hann færi brátt burt úr þessum heimi til að búa okkur öruggan sælustað til framtíðar svo við myndum einnig fá að vera þar sem hann er. Þar sem við fengjum að njóta okkar með okkar hætti í allri þeirri dýrð með honum sem Guð hefur búið öllum hans elskuðu börnum. Öllum þeim sem þiggja vilja og á hann trúa. Að loknum okkar tíma hér á jörð, sem greinilega er mis langur og engin skilur, kæmi hann og tæki okkur til sín. Og svo sagði hann eitthvað á þá leið að við þekktum veginn sem við ættum að fara til að komast af og rata heim í dýrðina.

Tómas, sem var einn af lærisveinum hans spurði hann þá: "Við vitum ekki hvert þú ferð. Hvernig getum við þá þekkt veginn?"

Jesús sagði þá við hann: "Ég er vegurinn, sannleikurinn og lífið. Enginn kemur til föðurins nema fyrir mig." "Ég er dyrnar. Sá sem gengur inn um mig mun frelsast. Og hann mun ganga inn og út og finna haga." "Ég er ljós heimsins. Sá sem fylgir mér mun ekki ganga í myrkri heldur hafa ljós lífsins." "Hjarta ykkar skelfist ekki né hræðist. Trúið á Guð og trúið á mig. Í húsi föður míns eru margar vistarverur. Væri ekki svo hefði ég þá sagt ykkur að ég færi burt að búa ykkur stað. Þegar ég er farinn burt og hef búið ykkur stað kem ég aftur og tek ykkur til mín svo að þið séuð einnig þar sem ég er."

"Ég mun ekki skilja ykkur eftir munaðarlaus." "Ég lifi og þið munuð lifa." Hver á annars meiri kærleika en þann að leggja líf sitt í sölurnar fyrir vini sína? Hvað þá svo þeir fái lifað um eilífð?

Verð með ykkur alla daga

Og Jesús sagði við þau: Allt vald er mér gefið á himni og á jörðu. Farið því og gerið allar þjóðir að lærisveinum. Skírið þau í nafni föður, sonar og heilags anda og kennið þeim að halda allt það sem ég hef boðið ykkur. Sjá, ég verð með ykkur alla daga allt til enda veraldar."

"Síðan fór hann með þau út í nánd við Betaníu, hóf upp hendur sínar og blessaði þau. En það varð á meðan hann var að blessa þau að hann skyldist frá þeim og var uppnuminn til himins."

Takk, Jesús. Dýrð sé Guði.

Með einlægri kærleiks- og friðarkveðju.

- Lifi lífið!

Höfundur er ljóðskáld og rithöfundur og aðdáandi lífsins.