Í sameingarkosningum 5. júní sl. felldu íbúar sveitarfélaganna Skagastrandar og Skagabyggðar, tillögu um að sameina A-Hún. i eitt sveitarfélag. Þá niðurstöðu ber að virða, þótt mér þyki hún röng. Sameiningartillagan var hins vegar samþykkt bæði á Blönduósi og í Húnavatnshreppi. Þess vegna batt ég vonir við að sveitarstjórnir þessarra sveitarfélaga myndu grípa boltann á lofti, og hefja sameiningarviðræður sín á milli, enda meirhluti íbúa búinn að sýna vilja til sameiningar.

En lengi má manninn reyna, þrátt fyrir að oddviti Húnavatnshrepps, og fyrrum formaður sameiningarnefndar, hafi hvatt fólk til sameiningar fyrir nokkrum vikum, þá virðist hann enga þörf telja til könnunarviðræðna núna! Þrátt fyrir að afgerandi meirihluti hafi greitt atkvæði með sameiningartillögunni (hans) þann 5. júní.

Og varaoddvitinn hans segir að þetta sé ekki rétti tíminn til að hefja svona viðræður núna! Öll gögn varðandi sameiningar eru til staðar, síðan fyrir kosningarnar um daginn. Taka þarf út úr þeim það sem tengdist Skagaströnd og Skagabyggð sérstaklega, og vinna með rest. Margfalt minni vinna (og kostnaður) núna, heldur en að ætla að gera það seinna.

En, “nei, við viljum sameiningu, bara ekki núna, ekki rétti tíminn.” Sem er rangt, rétti tíminn fyrir áframhaldandi viðræður er einmitt núna.

Í haust verða alþingiskosningar, því er einmitt rétti tíminn NÚNA til að láta ráðherra sveitarstjórnarmála bjóða sameiningarpakka, hann hefur ítrekað list vilja sínum til sameiningar sveitarfélaga, nú er lag. NÚNA er líka rétti tíminn til að halda áfram með undirbúning á Umhverfisakademíu á Húnavöllum, og óska eftir stuðningi við það verk í undirbúningi alþingiskosninga, áður en einhver annar stelur hugmyndinni.

NÚNA er líka rétti tíminn til að sameina Húnavallaskóla og Blönduskóla, einkum vegna barnanna á Húnavöllum. Mestallt þeirra félags-, tómstunda og íþróttastarf fer fram á Blönduósi, og þau þurfa að fara þangað eftir skóladag á Húnavöllum, ef þau vilja ekki fara á mis við það. Skóli er nefnilega aðeins meira en bara kennslutímarnir, ef einhver skyldi hafa gleymt því. Með þessu er ég ekkert að hallmæla skólastarfi á Húnavöllum, en nemendafjöldi þar, og fleira, kallar á nýjar áherslur.

NÚNA er líka rétti tíminn til að byggja upp sterkara sveitarfélag, sem getur betur tekið við auknum verkefnum frá ríkinu, eins og að er stefnt. Svo ekki sé minnst á aukin slagkraft i atvinnusköpun, sterkari rödd útávið og fleira.

Ég veit að margir sveitungar mínir, (og Blönduósingar) urðu fyrir vonbrigðum með ákvörðun meirihluta sveitarstjórnar Húnavatnshrepps nýverið og telja hann hafa tekið ranga ákvörðun. En röngum ákvörðunum má breyta, vilji er allt sem þarf. Því skora ég á meirihlutann að endurskoða ákvörðun sína, og skora jafnframt á þá sem eru sammála mér, að láta í sér heyra.

Vilji er allt sem þarf.

Jón Gíslason